काठमाडौं । नेकपा एमालेका नेता तथा राष्ट्रिय सभा सदस्य सोम पोर्तेलले गृहमन्त्रीको अभिव्यक्तिप्रति व्यंग्य गर्दै आफूलाई राजनीति सिकाउन आएको बताउने मन्त्रीले उल्टै धेरै कुरा सिकाउन सक्ने टिप्पणी गरेका छन् ।

गृहमन्त्रीले ‘हामी राजनीति सिकाउन आएका हौँ’ भनेको प्रसंग उल्लेख गर्दै पोर्तेलले सामाजिक सञ्जालमार्फत व्यंग्यात्मक शैलीमा विभिन्न प्रश्न उठाएका हुन् ।

उनले लेखेका छन्, ‘पानी बगाएर गृहमन्त्री कसरी बन्न सकिन्छ ? त्यो तपाईंबाटै सिक्नुपर्छ । सम्पत्ति कसरी लुकाउने ? अवैध सम्पत्तिलाई कसरी वैध बनाउने ? करोडौँ मूल्यको सेयर र सयौँ रोपनी जग्गा कसरी जोड्ने ?’

आफूमाथि प्रश्न उठेपछि छानबिनको नाटक कसरी गर्ने, आफूलाई ‘सर्वहारा र इमानदार’ देखाउन कसरी नाटक गर्ने तथा राजनीतिक स्टन्ट कसरी गर्ने भन्ने कुरा पनि गृहमन्त्रीबाटै सिक्नुपर्ने पोर्तेलको व्यंग्य छ ।

पोर्तेलले गृहमन्त्रीलाई लक्षित गर्दै भनेका छन्, ‘यी कुरा सिकाउन ट्युसन सेन्टर खोल्ने पो हो कि मन्त्रीज्यू ?’

उनले गृहमन्त्रीले अरूलाई नैतिकताको पाठ पढाउनुअघि आफूले एकपटक ऐनामा अनुहार हेर्नुपर्ने टिप्पणीसमेत गरेका छन् ।

‘नैतिकताको पाठ पढाउनु अघि आफ्नो अनुहार ऐनामा एकपटक हेर्ने पो हो कि मन्त्रीज्यू,’ पोर्तेलले भनेका छन् ।

पोर्तेलको यो अभिव्यक्ति गृहमन्त्रीको पछिल्लो राजनीतिक अभिव्यक्तिप्रति लक्षित देखिन्छ । उनले गृहमन्त्रीमाथि सम्पत्ति, छानबिन र राजनीतिक आचरणसँग सम्बन्धित गम्भीर प्रश्नसमेत उठाएका छन् ।