काठमाडौं । नेपाली कांग्रेसका सांसद अर्जुननरसिंह केसीले गत भदौ २३–२४ गते भएको जेनजी आन्दोलन जनतामा बढेको चरम निराशा र असन्तुष्टिको परिणाम भएको बताएका छन्।

प्रतिनिधिसभाको बैठकमा बोल्दै केसीले तत्कालीन सरकारको दमनका कारण आन्दोलनले उग्र रूप लिएको बताए। उनका अनुसार आन्दोलन कुनै दलको पक्ष वा विपक्षमा नभई शासनशैली, संस्कार र प्रणाली परिवर्तनका लागि भएको थियो।

‘यो आन्दोलन सरकार परिवर्तनका लागि मात्र होइन, संस्कार र शासनशैली परिवर्तन, सुशासन तथा विधिहीनता र दण्डहीनताको अन्त्यका लागि थियो,’ उनले भने, ‘आन्दोलनको मर्मअनुसार हामी अघि बढ्न सकेका छौँ कि छैनौँ, त्यसतर्फ गम्भीर हुनुपर्छ।’

ठूलो जनविश्वास र आशासहित बनेको सरकार सफल हुनुपर्नेमा जोड दिँदै केसीले अहिले बाढीका कारण चारैतिर संकटको अवस्था रहेको बताए।

उनले बाढी प्रभावितको उद्धार तथा सुरक्षामा अझै पर्याप्त काम हुन नसकेको भन्दै तत्काल उनीहरूको समस्या समाधानमा केन्द्रित हुन सरकारको ध्यानाकर्षण गराए।