काठमाडौं । नेपाली कांग्रेसले भोटेकोशी नदीमा आएको विनाशकारी बाढीपछि प्रभावित क्षेत्रमा खोज तथा उद्धार कार्यलाई थप प्रभावकारी बनाउन सरकारको ध्यानाकर्षण गराएको छ।

बुधबार बसेको प्रतिनिधिसभा बैठकको आकस्मिक समयमा कांग्रेस प्रमुख सचेतक बासना थापाले आवश्यकता अनुसार थप जनशक्ति, आधुनिक प्रविधि र उद्धार उपकरण परिचालन गर्न सरकारसँग माग गरिन्।

उनले सरकारको पहिलो दायित्व सत्ता जोगाउनु नभई नागरिकको ज्यान जोगाउनु भएको बताउँदै संकटको समयमा राज्यको बलियो उपस्थिति देखिनुपर्नेमा जोड दिइन्।

रसुवामा बाढी आएको दुई साताभन्दा बढी समय बितिसक्दा पनि खोज तथा उद्धारले अपेक्षित गति लिन नसकेको उनको आरोप थियो। ‘यो केवल प्राकृतिक विपत्ति होइन, सयौँ परिवारको जीवनसँग जोडिएको गम्भीर राष्ट्रिय संकट हो,’ उनले भनिन्।

रसुवा घटनापछि दैलेख तथा कर्णाली क्षेत्रका समेत थुप्रै नागरिक अझै सम्पर्कविहीन रहेको भन्दै थापाले उनीहरूको यथार्थ विवरण तत्काल अद्यावधिक गरी परिवारलाई सही सूचना उपलब्ध गराउन सरकारसँग माग गरिन्।