काठमाडौं । राष्ट्रिय स्वतन्त्र पार्टीका सभापति रवि लामिछानेले बाढीपहिरोपछि हुने पुनर्निर्माणलाई सबै राजनीतिक दलको साझा दायित्वका रूपमा अघि बढाउनुपर्ने बताएका छन्।

उनले राष्ट्रिय एकता कायम गर्दै विपत्तिको सामना गर्न सबै राजनीतिक शक्ति एकै ठाउँमा उभिनुपर्ने बताए। ठूला–ठूला विपत्तिबाट मुलुक विगतमा पनि उठेको उल्लेख गर्दै लामिछानेले यसपटक पनि देश उठ्ने विश्वास व्यक्त गरे।

‘अबको पुनर्निर्माण सबै राजनीतिक दलको साझा दायित्व हो। राष्ट्रिय एकता कायम गरेर एकै शक्ति भएर विश्वसामु उभिनुपर्छ। ठूला–ठूला विपत्तिबाट उठेका छौँ, यसपटक पनि उठ्नेछौँ,’ उनले भने।

रास्वपा देश निर्माणको दृढ संकल्पसहित गठन भएको भन्दै लामिछानेले पार्टी कुनै पनि परिस्थितिमा विचलित नहुने बताए।

‘रास्वपा देश बनाउने अदम्य साहस बोकेर बनेको पार्टी हो, हामी विचलित हुने छैनौँ। रास्वपा जवाफदेहिताबाट भाग्दैन,’ उनले भने।

उनले बाढी प्रभावितको उद्धार, राहत र पुनर्निर्माणका लागि सरकारले उपलब्ध सबै स्रोत–साधनको प्रभावकारी प्रयोग गर्नुपर्नेमा जोड दिए।