काठमाडौं । राष्ट्रिय स्वतन्त्र पार्टीका सांसद राजीव खत्रीले जेनजी आन्दोलनका क्रममा भदौ २३ गते भएको गोली प्रहारको घटनालाई छानबिनको दायरामा ल्याएर दोषीमाथि कारबाही गर्न माग गरेका छन् ।

बुधबार प्रतिनिधिसभामा बोल्दै उनले सडकमा बगेको रगत र त्यसपछिका घटनामा जलेका संरचनाले भदौ २३ गते उठेका प्रश्नलाई दबाउन नसक्ने बताए ।

उनले भदौ २३ को गोलीकाण्डलाई त्यसको भोलिपल्ट भएको विध्वंससँग जोड्दै घटनालाई एउटै शृङ्खलाका रूपमा बुझ्नुपर्ने तर्क गरे ।

‘भदौ २३ गते देशमा गोली चलेको थियो अनि २४ गते विध्वंस भयो । २३ गते कारण हो भने २४ गते परिणाम हो,’ खत्रीले भने ।

खत्रीले आन्दोलनमा सडकमा उत्रिएका युवासँग राज्यसत्ता, प्रहरी वा प्रशासनको शक्ति नभएको बताए । उनीहरूसँग केवल आफ्ना प्रश्न र असन्तुष्टि रहेको उनको भनाइ थियो ।

राज्यसँग भने शक्ति र बन्दुक रहेको भन्दै उनले नागरिकका प्रश्नको जवाफ बल प्रयोगबाट दिइएको आरोप लगाए ।

‘सडकमा उभिएका ती युवाको हातमा सत्ता थिएन, प्रहरी थिएन, प्रशासन थिएन । उनीहरूसँग थियो त केवल प्रश्न । राज्यसँग भने बन्दुक थियो र प्रश्नको उत्तर गोलीबाट दियो,’ उनले भने ।

सांसद खत्रीले भदौ २४ गते भएका विध्वंसका घटनालाई मात्रै केन्द्रमा राखेर भदौ २३ को गोलीकाण्डलाई ओझेलमा पार्न खोजिएको भन्दै आपत्ति जनाए ।

उनका अनुसार एउटा घटनालाई अर्को घटनाले छोप्ने प्रयास गर्नु न्यायको बाटो होइन । गोली चलाउने निर्णय कसरी भयो, त्यसको जिम्मेवारी कसले लियो र त्यसबाट भएको क्षतिको जवाफदेहिता कसरी तय हुन्छ भन्ने प्रश्नको उत्तर खोजिनुपर्ने उनले बताए ।

सडकमा बगेको रगत र त्यसपछि जलेका संरचनालाई अलग–अलग घटनाका रूपमा हेर्दा आन्दोलनको वास्तविक पृष्ठभूमि र त्यसबाट उत्पन्न परिस्थितिको मूल्याङ्कन अधुरो हुने उनको भनाइ थियो ।

उनले भदौ २३ गतेको गोली प्रहारको निष्पक्ष छानबिन गरी दोषीमाथि कारबाही गर्न सरकारसँग माग गरे ।