वीरगञ्ज। राष्ट्रिय प्रजातन्त्र पार्टी (राप्रपा)का वीरगञ्ज, पर्साका प्रदीपकुमार सुवेदीले पार्टीको साधारण सदस्यसमेत नरहने गरी राजीनामा दिएका छन्।

राप्रपाका केन्द्रीय अध्यक्ष राजेन्द्रप्रसाद लिङ्देनलाई सम्बोधन गर्दै सुवेदीले राजीनामा पत्र बुझाएका हुन्। पार्टी स्थापनाकालदेखि नै आफू पार्टीको वृद्धि, सुदृढ संगठन निर्माण तथा देशहितका लागि कर्तव्यनिष्ठ कार्यकर्ताका रूपमा सक्रिय रहँदै आएको उनले पत्रमा उल्लेख गरेका छन्।

तर, लामो समय पार्टीमा आबद्ध रहेर जिम्मेवारी निर्वाह गरेपछि अब भने पार्टीबाट अलग हुने निर्णय गरेको सुवेदीले बताएका छन्। उनले पत्रमार्फत ‘आजको मितिदेखि पार्टीको साधारण सदस्यसमेत नरहने गरी पार्टी परित्याग गरेको’ जानकारी गराएका छन्।

सुवेदीले पार्टीप्रति आफ्नो शुभेच्छा भने कायमै रहने उल्लेख गर्दै पत्रको अन्त्यमा ‘पार्टी सधैँ भलो होस्’ भन्ने शुभकामना दिएका छन्।