हेटौँडा । राष्ट्रिय प्रजातन्त्र पार्टी (राप्रपा) बागमती प्रदेश संसदीय दलले पार्टीको ह्विप उल्लंघन गरेको भन्दै पाँच जना प्रदेशसभा सदस्यलाई पदबाट हटाउन प्रदेशसभा सचिवालयलाई जानकारी गराएको छ।

संसदीय दलको पत्रअनुसार भुवनकुमार पाठक, कुमारी तामाङ, लक्ष्मी घिमिरे, धनेश्वरी प्रजापति र आशा लामालाई प्रदेशसभा सदस्यबाट हटाउने निर्णय गरिएको हो।

पत्रमा बागमती प्रदेश सरकारमा सहभागी हुने निर्णयअनुसार मुख्यमन्त्री किरण थापा मगर नेतृत्वको सरकारको पक्षमा अनिवार्य मतदान गर्न पार्टी संसदीय दलले ह्विप जारी गरेको उल्लेख छ।

तर, सम्बन्धित प्रदेशसभा सदस्यहरू बैठकमा अनुपस्थित भई ह्विप उल्लंघन गरेको दाबी गरिएको छ।

उनीहरूलाई ह्विप उल्लंघनबारे स्पष्टीकरण सोधिए पनि तोकिएको समयभित्र चित्तबुझ्दो जवाफ नदिएको भन्दै पार्टी विधान तथा संसदीय दलको विधानअनुसार कारबाही गर्ने निर्णय भएको पत्रमा उल्लेख छ।

राप्रपा बागमती प्रदेश संसदीय दलले प्रदेशसभा सदस्यबाट हटाउने निर्णय कार्यान्वयन गरी प्रदेशसभालाई जानकारी गराइदिन प्रदेशसभा सचिवालयलाई आग्रह गरेको छ।