जनकपुरधाम । राष्ट्रिय प्रजातन्त्र पार्टी (राप्रपा) धनुषा जिल्ला कार्यसमितिका पदाधिकारी तथा सदस्यहरूले जिल्ला अधिवेशन तत्काल रोक्न माग गरेका छन् । यही भदौ २७ गते अधिवेशन गर्न लागिएको भन्दै उनीहरूले पार्टीका प्रमुख निर्वाचन संयोजकसमक्ष पत्र पठाएर अधिवेशन रोक्न आग्रह गरेका हुन् ।

पत्रमा राप्रपाको विधानअनुसार वडा, गाउँपालिका, नगरपालिका, प्रदेश र क्षेत्रीय समिति गठन तथा अधिवेशन सम्पन्न भएपछि मात्रै जिल्ला अधिवेशन गर्नुपर्ने व्यवस्था रहेको उल्लेख छ । तर विधानको प्रक्रिया पूरा नगरी जिल्ला अधिवेशन गर्न लागिएको उनीहरूको आरोप छ ।

जिल्ला कार्यसमितिले आफूहरूलाई समेत पर्याप्त जानकारी नदिई तथा बैठकको निर्णयसमेत नगरी अधिवेशन गर्न लागिएको दाबी गरेको छ । व्यक्तिगत खुसीका आधारमा अधिवेशन गराउँदा पार्टीभित्र संकट निम्तिन सक्ने भन्दै उनीहरूले चिन्ता व्यक्त गरेका छन् ।

‘विधानलाई बेवास्ता गरी अवैधानिक जिल्ला अधिवेशन रोक्न’ आग्रह गर्दै पत्रमा पार्टीमा सुरक्षा, सद्भाव र एकता कायम गर्न आवश्यक निर्णय लिन माग गरिएको छ ।

साथै सम्पूर्ण कार्यकर्ताको सहभागिता सुनिश्चित हुने गरी विधानसम्मत ढंगबाट जिल्ला अधिवेशन गराउन उनीहरूले निर्वाचन संयोजकसँग आग्रह गरेका छन् ।

पत्रमा जिल्ला उपाध्यक्ष रामनारायण ठाकुर, पूर्वजिल्ला अध्यक्ष रामचन्द्र मुखिया, जिल्ला सहसचिव रविन्द्र यादव तथा जिल्ला सदस्य अरविन्द दुबे र सुभाषकान्त ठाकुरसहितले हस्ताक्षर गरेका छन् ।