काठमाडौं । प्रमुख प्रतिपक्षी नेपाली कांग्रेसले विपक्षी दलहरूलाई एकै ठाउँमा राखेर छलफल थालेको छ ।

रसुवाको भोटेकोशी बाढीपछि उत्पन्न अवस्था र मुलुकको पछिल्लो राजनीतिक घटनाक्रमबारे साझा धारणा बनाउन कांग्रेसले बैठक बोलाएको हो ।

सिंहदरबारस्थित कांग्रेस संसदीय दलको कार्यालयमा विपक्षी दलहरूको बैठक सुरु भएको छ । बैठकमा बाढीपीडितको उद्धार, राहत तथा पुनस्र्थापनाको अवस्थासँगै सरकारका पछिल्ला कामकारबाहीबारे छलफल हुने बताइएको छ ।

बैठकमा संसद्मा विपक्षी दलहरूले खेल्ने भूमिका र आगामी राजनीतिक रणनीतिबारे समेत छलफल हुने कांग्रेसले जनाएको छ ।

रसुवाको बाढीले ठूलो क्षति पुर्‍याएपछि राहत तथा उद्धारको काम प्रभावकारी बनाउनुपर्ने विषय अहिले राजनीतिक बहसको समेत केन्द्रमा छ । यही अवस्थामा कांग्रेसले अन्य विपक्षी दलसँग छलफल अघि बढाएको हो ।

बैठकमा नेकपा एमाले, नेपाली कम्युनिस्ट पार्टी, श्रम संस्कृति पार्टी र राष्ट्रिय प्रजातन्त्र पार्टीलगायत विपक्षी दलका प्रतिनिधिलाई बोलाइएको छ ।

कांग्रेसले सरकारका कामकारबाहीमाथि निगरानी बढाउँदै विपद् व्यवस्थापनमा सरकारको भूमिकाबारे पनि विपक्षी दलसँग साझा धारणा बनाउने तयारी गरेको छ।