काठमाडौं । बैंकिङ कसुर मुद्दामा पुर्पक्षका लागि थुनामा रहेका व्यवसायी शंकरलाल अग्रवाललाई थुनामुक्त गर्न माग गर्दै दायर भएको बन्दीप्रत्यक्षीकरण रिटमाथि सर्वोच्च अदालतमा बिहीबार सुनुवाइ हुँदैछ ।

प्रधानन्यायाधीश डा. मनोजकुमार शर्मा र न्यायाधीश बालकृष्ण ढकालको संयुक्त इजलासमा अग्रवालको रिट पेसीमा राखिएको हो ।

उच्च अदालत पाटनले बैंकिङ कसुर मुद्दामा अग्रवाललाई पुर्पक्षका लागि थुनामा पठाउने आदेश गरेपछि उनकी तर्फबाट दीपा अग्रवालले बन्दीप्रत्यक्षीकरणको रिट दायर गरेकी थिइन् ।

गत साउन ७ गते उच्च अदालत पाटनका न्यायाधीश अर्जुनप्रसाद कोइराला र कविप्रसाद न्यौपानेको वाणिज्य इजलासले अग्रवाललाई नख्खु कारागारमा थुनामा राखेर मुद्दाको प्रक्रिया अघि बढाउन आदेश दिएको थियो ।

अदालतको आदेशअनुसार जगदम्बा स्टिलको बैंक खाता सञ्चालनको अधिकार पाएका परिवारका सदस्यहरूले व्यावसायिक प्रयोजनका लागि लिएको कर्जा अन्यत्र प्रयोग गरेको देखिएको छ । यसलाई बैंकिङ कसुर तथा सजाय ऐन, २०६४ को दफा ८ अन्तर्गतको कसुरसँग जोडिएको छ ।

अदालतले अग्रवालको बैंक खाता प्रयोग भएको वित्तीय कारोबार जटिल प्रकृतिको रहेको र त्यसबाट बैंकिङ प्रणालीमा जोखिम उत्पन्न भएको निष्कर्षसहित मुद्दाको अन्तिम टुंगो नलागेसम्म थुनामै राख्ने आदेश दिएको हो ।

जगदम्बा स्टिलले नेपाल इन्भेष्टमेन्ट मेगा बैंकको नेतृत्वमा रहेको कन्सोरियमबाट चालु पुँजी कर्जा लिएको थियो । तर, उक्त रकम निर्धारित व्यावसायिक प्रयोजनमा प्रयोग नगरी जग्गा खरिद तथा अन्य कम्पनीको शेयरमा लगानी गरिएको आरोपमा बैंकिङ कसुरको मुद्दा अघि बढेको हो ।

अब सर्वोच्च अदालतले अग्रवाललाई थुनामा राख्ने उच्च अदालतको आदेश र बन्दीप्रत्यक्षीकरण रिटमा उठाइएका कानुनी प्रश्नमाथि सुनुवाइ गर्नेछ । सर्वोच्चको आदेशले अग्रवालको थुनाको निरन्तरता वा त्यसमा हुने परिवर्तनबारे बाटो तय गर्नेछ ।