रसुवा। रसुवाको नौकुण्ड गाउँपालिका–५ स्थित भोर्ले बजारमा खसेको पहिरो हटाएपछि नुवाकोट–धुन्चे सडक सञ्चालनमा आएको छ ।

बागेश्वरी मन्दिरनजिकै बुधबार साँझ करिब ५ बजे खसेको पहिरो बिहीबार बिहान १० बजे हटाइएको हो । पहिरोका कारण करिब १७ घण्टासम्म सडक अवरुद्ध हुँदा यात्रु तथा मालवाहक सवारीसाधन बाटोमै रोकिएका थिए ।

पहिरो हटाउन बिहीबार बिहानैदेखि सडकको दुवैतर्फ डोजर परिचालन गरिएको थियो । पहिरो पन्छाएपछि रोकिएका सवारीसाधन गन्तव्यतर्फ लागेका छन् ।

बेत्रावती हुँदै स्याफ्रुबेँसी–धुन्चे जोड्ने मुख्य सडक बाढीपछि अवरुद्ध रहेकाले भोर्ले हुँदै जाने सडक वैकल्पिक मार्गका रूपमा प्रयोग हुँदै आएको छ ।

पहिरोका कारण काठमाडौं तथा नुवाकोटबाट धुन्चे जाने र धुन्चेबाट फर्कने यात्रुसँगै राहत सामग्री बोकेका सवारीसाधनसमेत बीच बाटोमै रोकिएका थिए ।