काठमाडौं । एसीसी मेन्स प्रिमियर कपमा नेपालले ओमानमाथि शानदार जित निकाल्दै प्रतियोगिताको फाइनलमा स्थान बनाएको छ।

नेपालले दिएको १४८ रनको लक्ष्य पछ्याएको ओमान २६ ओभरमा ६० रनमै अलआउट भयो। ओमानका लागि जतिन्दर सिंहले सर्वाधिक २५ रन बनाए। त्यसबाहेक अन्य ब्याटरले उल्लेख्य योगदान दिन सकेनन्।

नेपालका लागि दीपेन्द्रसिंह ऐरी र सन्दीप लामिछानेले उत्कृष्ट बलिङ गरे। ऐरीले ६ ओभरमा ११ रन खर्चिएर ३ विकेट लिए भने लामिछानेले ६ ओभरमा ९ रन खर्चिएर ३ विकेट लिए। ललित राजवंशीले ५ ओभरमा १२ रन दिँदै २ विकेट लिए। रोहित पौडेलले पनि विकेट लिए।

यसअघि टस हारेर पहिले ब्याटिङ गरेको नेपालले ४५.४ ओभरमा सबै विकेट गुमाएर १४७ रन बनाएको थियो। नेपालका लागि दीपेन्द्रसिंह ऐरीले सर्वाधिक ५१ रन बनाए। उनले ७६ बलमा ४ चौका प्रहार गरे। बसिर अहमदले ८८ बलमा ३ चौका र १ छक्कासहित ४७ रन बनाए।

त्यस्तै देव खनालले १३ तथा आसिफ शेखले ११ रन जोडे। ओमानका हस्नैन शाह र जय ओदेड्राले समान ३-३ विकेट लिएर नेपाली ब्याटरलाई दबाबमा राखेका थिए।

तर नेपालका बलरले ओमानको ब्याटिङ लाइनअपलाई टिक्न नदिँदा टोली सामान्य लक्ष्यमा समेत दबाबमा परेको हो। ओमानलाई सस्तैमा समेट्दै नेपालले एसीसी मेन्स प्रिमियर कपको सेमिफाइनल यात्रा तय गरेको छ।