काठमाडौं । राष्ट्रिय स्वतन्त्र पार्टी (रास्वपा) का प्रमुख सचेतक कवीन्द्र बुर्लाकोटीले भोटेकोशी बाढीबाट प्रभावित क्षेत्रमा खोज तथा उद्धारलाई थप प्रभावकारी र तीव्र बनाउन सरकारसँग माग गरेका छन् ।

प्रतिनिधिसभाको बैठकमा बोल्दै बुर्लाकोटीले विपद्को क्षति ठूलो भएकाले पर्याप्त जनशक्ति, उपकरण र स्रोतसाधन परिचालन गरेर उद्धार कार्य अघि बढाउनुपर्ने बताए ।

उनले बेपत्ता, उद्धार गरिएका तथा मृतकको प्रमाणित विवरण नियमित रूपमा प्रभावित वडासम्म पुर्‍याउने व्यवस्था गर्न पनि सरकारको ध्यानाकर्षण गराए । विपद्मा परेका व्यक्ति तथा पीडित परिवारले प्रत्यक्ष र भरपर्दो सूचना पाउने संयन्त्र आवश्यक रहेको उनको भनाइ थियो ।

‘खोज तथा उद्धारका लागि दक्ष जनशक्ति, आवश्यक उपकरण र स्रोतसाधनसहितको संयन्त्र परिचालन गरी कामलाई अझ तीव्र बनाउनुपर्छ,’ बुर्लाकोटीले भने ।

भेटिएका शवको तत्काल पहिचानका लागि डीएनए परीक्षणलाई प्रभावकारी बनाउन थप जनशक्ति, उपकरण र स्रोतसाधन परिचालन गर्नुपर्ने उनले बताए ।

बुर्लाकोटीले विपद्पछिको पुनर्निर्माणमा समेत सरकारले दीर्घकालीन योजना बनाउनुपर्नेमा जोड दिए । बाढी, पहिरोजस्ता जोखिम रहेका क्षेत्रमा बस्ती, सार्वजनिक कार्यालय तथा अन्य संरचना निर्माण नगर्ने नीति अवलम्बन गर्नुपर्ने उनको भनाइ छ ।

जोखिमयुक्त क्षेत्रमा बसोबास गरिरहेका नागरिकलाई सम्भावित विपद्बारे सचेत गराउन व्यापक जनचेतनामूलक कार्यक्रम सञ्चालन गर्न पनि उनले सरकारसँग माग गरे।