काठमाडौं। उद्योगमन्त्री गौरीकुमारी यादवले पदबाट राजीनामा दिएकी छन् ।

इन्धन आपूर्ति सहज बनाउन नसकेको भन्दै आलोचना भइरहेका बेला उद्योगीलाई लक्षित अभिव्यक्तिका कारण समेत विवादमा परेकी यादवले अन्ततः मन्त्री पदबाट राजीनामा दिएकी हुन् ।

राजीनामा दिएपछि मन्त्रालयबाट बाहिरिने क्रममा यादव भावुक देखिएकी थिइन् । मन्त्रालय परिसरबाट निस्कँदा उनको आँखामा आँसु देखिएको स्रोतले जनाएको छ ।

सञ्चारकर्मीले प्रतिक्रिया लिन खोजे पनि यादवले कुनै जवाफ दिइनन् । उनी राजीनामा दिएलगत्तै मन्त्रालयबाट बाहिरिएकी थिइन् ।

तत्कालीन श्रममन्त्री दीपक साह विवादमा परेर राजीनामा दिएपछि रिक्त भएको जिम्मेवारीमा मन्त्रालय हेरफेर गर्दै यादवलाई उद्योग मन्त्रालयको जिम्मेवारी दिइएको थियो ।

तर, साहको राजीनामापछि मन्त्री बनेकी यादव पनि विवादबाट उम्किन सकिनन्। अन्ततः उनले समेत राजीनामा दिएर पदबाट बाहिरिनुपरेको छ।