काठमाडौं । न्याय परिषद्ले उच्च तथा जिल्ला अदालतमा न्यायाधीश नियुक्ति र सरुवा गरेको छ।

परिषद्को आज बसेको बैठकले सर्वोच्च अदालतका रजिष्ट्रार भद्रकाली पोखरेललाई उच्च अदालत सुर्खेतको न्यायाधीशमा नियुक्त गरी पदस्थापन गरेको छ।

त्यस्तै कास्की जिल्ला अदालतका न्यायाधीश हिमलाल बेल्बासेलाई उच्च अदालत जनकपुर र फैसला कार्यान्वयन निर्देशनालयका महानिर्देशक गजेन्द्रबहादुर सिंहलाई उच्च अदालत विराटनगरको न्यायाधीशमा नियुक्त गरिएको छ।

परिषद्ले सर्वोच्च अदालतका इजलास अधिकृत भरतकुमार दाहाललाई कैलाली जिल्ला अदालतको न्यायाधीशमा समेत नियुक्त गरेको छ।

बैठकले १५ जना जिल्ला न्यायाधीशको सरुवा गरेको छ। सरुवा हुने न्यायाधीशहरूको नाम र नयाँ पदस्थापनबारे परिषद्ले विस्तृत विवरण सार्वजनिक गर्ने जनाइएको छ।