काठमाडौं । नेपाली कांग्रेसका सांसद विष्णुबहादुर खड्काले कर्णाली प्रदेशका प्रादेशिक अस्पतालमा विशेषज्ञ चिकित्सकको अभाव हुँदा बिरामीले उपचार नपाएर ज्यान गुमाउनुपर्ने अवस्था रहेको भन्दै सरकारको ध्यानाकर्षण गराएका छन्।

प्रतिनिधिसभाको आजको बैठकमा विशेष समय लिएर बोल्दै खड्काले कर्णालीको भौगोलिक विकटता, गरिबी र कमजोर यातायात सुविधाका कारण स्वास्थ्य सेवा झनै कठिन बनेको बताए।

उनका अनुसार कर्णालीका प्रादेशिक अस्पतालमा मुटुरोग, युरोलोजी र न्युरोलोजीका विशेषज्ञ चिकित्सकको अभाव छ। क्याथल्याबको मेसिन जडान भएको दुई वर्ष बितिसक्दा पनि त्यसका लागि आवश्यक कार्डियोलोजिस्ट नहुँदा उपकरण प्रयोगविहीनजस्तै भएको उनको भनाइ छ।

‘क्याथल्याबको मेसिन जडान भएको दुई वर्ष भइसक्यो, तर त्यहाँ कार्डियोलोजिस्ट डाक्टर हुनुहुन्न । न युरोलोजिस्ट छन्, न त न्युरोलोजिस्ट नै,’ खड्काले भने।

सांसद खड्काले कर्णालीका अधिकांश बिरामीलाई विशेषज्ञ उपचारका लागि काठमाडौं वा लुम्बिनी प्रदेशका अस्पतालमा रिफर गर्नुपर्ने अवस्था रहेको बताए।

‘९९ प्रतिशत न्युरोका बिरामीलाई हेर्नुपर्ने डाक्टरको अभावमा समयमै उपचार पाउन सकेका छैनन्,’ उनले भने, ‘गरिब जनता महँगो खर्च गरेर उपचारका लागि बाहिर जान सक्ने अवस्थामा छैनन्।’

उनले प्रादेशिक अस्पतालमा रहेका डायलासिस मेसिनसमेत पटकपटक बिग्रिने गरेको भन्दै त्यसबाट मिर्गौला रोगी थप समस्यामा परेको बताए।

कर्णालीको भौगोलिक विकटता र आर्थिक अवस्थालाई ध्यानमा राखेर दुर्गम क्षेत्रमा स्वास्थ्य सेवा विस्तारलाई राज्यले विशेष प्राथमिकता दिनुपर्ने खड्काको माग छ।

उनले आवश्यक विशेषज्ञ चिकित्सक, उपकरण र नियमित स्वास्थ्य सेवा उपलब्ध गराएर कर्णालीका नागरिकलाई सामान्य उपचारका लागि समेत प्रदेशबाहिर जानुपर्ने बाध्यता अन्त्य गर्न सरकारसँग आग्रह गरे।