काठमाडौं । मधेस स्वास्थ्य विज्ञान प्रतिष्ठान, जनकपुरका चिकित्सक डा. सरोज साहमाथि कार्यस्थलमै सांघातिक आक्रमण भएको छ।

घटनाप्रति नेपाल चिकित्सक संघले गम्भीर आपत्ति जनाएको छ। संघले शुक्रबार विज्ञप्ति जारी गर्दै घटनाको भर्त्सना गरेको हो।

बिहीबार ड्युटीमा रहेका बेला डा. साहमाथि बिरामीका आफन्तसहितको समूहले आक्रमण गरेको संघले जनाएको छ।

संघका अनुसार चिकित्सक र स्वास्थ्यकर्मीमाथि यस्ता घटना दोहोरिरहेका छन्। यसले स्वास्थ्यकर्मीको सुरक्षा र आत्मसम्मानमा असर पारेको संघको भनाइ छ।

घटनामा संलग्नलाई तत्काल पक्राउ गर्न संघले माग गरेको छ। दोषीमाथि कानुनी कारबाही गर्न पनि संघले आग्रह गरेको छ।

‘समग्र स्वास्थ्य क्षेत्रलाई आतंकित पार्ने गरी घटाइएको यस्तो अमानवीय घटनामा संलग्न दोषीहरूलाई अविलम्ब कानूनको दायरामा ल्याउनुपर्छ,’ संघले भनेको छ।

अध्यक्ष डा. बद्री रिजाल र महासचिव डा. विश्वराज दवाडीले विज्ञप्ति जारी गरेका हुन्।

संघले स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन, २०६६ को पहिलो संशोधन, २०७९ अनुसार कारबाही गर्न माग गरेको छ।

स्वास्थ्य संस्थामा सुरक्षित वातावरण सुनिश्चित गर्न पनि संघले सम्बन्धित निकायको ध्यानाकर्षण गराएको छ।