भरतपुर । नेपाली कांग्रेसको १५औँ महाधिवेशनअन्तर्गत चितवनमा वडा अधिवेशन असोज ३ र ४ गते हुने भएको छ।

जिल्लाका ९८ वटै वडामा अधिवेशन हुनेछ। त्यसमा २७ हजार ५ सय क्रियाशील सदस्य सहभागी हुने कांग्रेस चितवनले जनाएको छ।

कांग्रेस चितवनले शुक्रबार भरतपुरमा पत्रकार सम्मेलन गरी अधिवेशनको तयारीबारे जानकारी दिएको हो।

सभापति राजेश्वर खनालका अनुसार सम्बन्धित वडाको अनुकूलताअनुसार असोज ३ वा ४ गते अधिवेशन हुनेछ। वडा अधिवेशनमा युवा र महिलाको सहभागिता सुनिश्चित गरिने उनले बताए।

भूगोल, जातीय समुदाय र फरक क्षमता भएका व्यक्तिको समावेशी सहभागितालाई पनि प्राथमिकता दिइएको खनालले बताए।

वडा अधिवेशनबाट चितवनमा ३ हजार १ सय क्षेत्रीय प्रतिनिधि निर्वाचित हुनेछन्।

उनीहरूले पालिका कार्यसमिति र प्रदेशसभा क्षेत्रीय कार्यसमिति चयन प्रक्रियामा सहभागिता जनाउनेछन्। प्रदेश र प्रतिनिधिसभा क्षेत्रीय अधिवेशनका प्रतिनिधि पनि उनीहरूबाटै चयन हुनेछन्।

त्यसैगरी महाधिवेशन प्रतिनिधि, महासमिति सदस्य र जिल्ला कार्यसमिति चयन प्रक्रियामा पनि क्षेत्रीय प्रतिनिधिको भूमिका रहनेछ।

कांग्रेस चितवनका अनुसार असोज ७ गते पालिका अधिवेशन हुनेछ। असोज १० गते प्रदेशसभा र प्रतिनिधिसभा क्षेत्रीय अधिवेशन गर्ने कार्यतालिका छ।

यससँगै चितवनमा १५औँ महाधिवेशनअन्तर्गत तल्लो तहदेखि नेतृत्व चयन प्रक्रिया अघि बढ्नेछ।