काठमाडौं। कांग्रेस थापा गगन थापाले केही दिन अघि एउटा सार्वजनिक कार्यक्रमबाट निवर्तमान सभापति शेरबहादुर देउवालाई भनेका थिए, ‘दाई तपाईंलाई ढाँटे। ढाँटे दाई ढाँटे।’

२८ साउनमा नेपाली कांग्रेसका निवर्तमान सभापति शेरबहादुर देउवा स्वदेश फर्किंदा त्रिभुवन अन्तर्राष्ट्रिय विमानस्थलमा उनको भव्य स्वागत भयो। देउवालाई स्वागत गर्न कांग्रेसका नेतादेखि हजारौँ समर्थकसम्म विमानस्थल पुगेका थिए। पूर्णबहादुर खड्का, शशांक कोइराला, मीनबहादुर विश्वकर्मा, रामहरि खतिवडालगायतका नेताहरू नै विमानस्थलमा उपस्थित भएर देउवालाई स्वागत गरेका थिए।

विमानस्थलमा देखिएको उक्त दृश्यले कांग्रेसभित्र देउवाको प्रभाव अझै बलियो रहेको सन्देश दिएको थियो। लामो समयदेखि पार्टीको नेतृत्वमा रहेका देउवा पनि समर्थक र नेताहरूको बाक्लो उपस्थितिबाट उत्साहित देखिन्थे। तर, स्वदेश फर्किएको एक महिना नपुग्दै कांग्रेसको आन्तरिक शक्ति समीकरणमा ठूलो परिवर्तन आएको छ। देउवालाई विमानस्थलमा स्वागत गर्न पुगेका अधिकांश प्रभावशाली नेताहरू अहिले सभापति गगन थापाको कित्तामा पुगेका छन्।

कांग्रेसभित्रको शक्ति संघर्ष चर्किंदै जाँदा पार्टी अहिले तीन फरक धारमा विभाजित देखिएको छ। अधिकांश नेताहरू सभापति गगन थापाको नेतृत्वमा रहेको संस्थापन पक्षमा खुलेका छन् भने केही नेताहरू अझै देउवा र शेखर कोइरालाको पक्षमा रहेका छन्। यसले पार्टीभित्रको आगामी महाधिवेशनलाई थप पेचिलो बनाएको छ।

कांग्रेसको १५औँ महाधिवेशन नजिकिँदै गर्दा विवाद झन् चर्किएको हो। गगन थापा नेतृत्वको संस्थापन पक्षले असोज १६ देखि १९ गतेसम्म केन्द्रीय महाधिवेशन गर्ने कार्यतालिका सार्वजनिक गरिसकेको छ। त्यसको काउन्टरमा देउवा पक्षले मंसिर २१ देखि २३ गतेसम्म छुट्टै महाधिवेशन गर्ने कार्यतालिका अघि सारेको छ। शेखर कोइराला भने तत्काल दुवै प्रक्रियामा सहभागी नहुने पक्षमा देखिएका छन्।

छुट्टै महाधिवेशनको तयारीमा रहेका देउवाका लागि भने आफ्नै समूहका प्रभावशाली नेताहरू गगनको पक्षमा खुलेपछि चुनौती थपिएको छ। डिना उपाध्याय, किशोरसिंह राठोर, श्याम घिमिरे, रामहरि खतिवडा, सुरेन्द्र पाण्डे, मीनबहादुर विश्वकर्मा, ज्ञानेन्द्रबहादुर कार्की, इन्द्रबहादुर बानियाँ, नैनसिंह महर, जीवनबहादुर शाही, सुशीला थिङ र गोविन्द भट्टराईलगायत नेता शुक्रबार सानेपा पुगेर गगन नेतृत्वको पक्षमा उभिएका छन्। उनीहरू असोज ३ गतेदेखि सुरु हुने वडा अधिवेशनमा सहभागी हुने तयारीमा छन्।

देउवाले भने आफ्नै नेतृत्वमा १५औँ महाधिवेशन सम्पन्न गरेर पार्टीको नेतृत्व हस्तान्तरण गर्नुपर्ने धारणा राख्दै आएका छन्। सहमति बेगर विशेष महाधिवेशन गर्दा कांग्रेस कमजोर र विभाजित हुनसक्ने चेतावनी पनि उनले दिँदै आएका छन्।

पूर्णबहादुर खड्का र डा. शेखर कोइराला भने अझै स्पष्ट रूपमा कुनै पक्षमा खुलेका छैनन्। खड्कानिकट अधिकांश नेता गगनको पक्षमा पुगिसकेका छन् भने शेखरले पार्टी एकताका लागि मध्यमार्गी भूमिका खेल्ने बताउँदै आएका छन्।

यसरी २८ साउनमा विमानस्थलमा देखिएको देउवाको बलियो साथ एक महिनामै बदलिएको छ। एकपछि अर्को प्रभावशाली नेता गगनको पक्षमा खुलेपछि देउवाको छुट्टै महाधिवेशनको तयारी र कांग्रेसभित्रको आगामी शक्ति समीकरण थप रोचक बनेको छ।