काठमाडौं। नेकपा एमालेका सचिव महेश बस्नेतले वर्तमान सरकारका गतिविधिबाट जनता निराश हुन थालेको दाबी गरेका छन्।

सरकार गठन भएको लामो समय नबित्दै जनतामा पछुतोको भावना देखिन थालेको उनको भनाइ छ ।

शुक्रबार एमालेको निर्वाचन समीक्षा तथा पार्टी पुनर्गठन कार्यदलको बैठकपछि सञ्चारकर्मीसँग कुरा गर्दै बस्नेतले अहिले निर्वाचन हुने हो भने जनताले आफूले दिएको मत फिर्ता लिन चाहेको दाबी गरे ।

उनले अन्तरिम सरकार र वर्तमान सरकारका गतिविधिले जनतामा निराशा बढाएको आरोप लगाए । नयाँ पुस्तालाई सामाजिक सञ्जाल र अल्गोरिदममार्फत प्रभावित पारेर वर्तमान राजनीतिक परिस्थिति निर्माण गरिएको दाबीसमेत उनले गरे ।

‘पछिल्लो एक वर्षको अन्तरिम र वर्तमान सरकारका कारण जनताले आफ्नो निर्णय गलत भयो भनेर पछुतो गरिरहेको अवस्था छ,’ बस्नेतले भने, ‘अहिले निर्वाचन हुने हो भने जनताले त्यो जनादेश फिर्ता गर्नुपर्छ भन्ने मनस्थितिमा पुगेका छन् ।’

प्रतिनिधिसभा पुनःस्थापनासम्बन्धी मुद्दा सर्वोच्च अदालतमा विचाराधीन रहेको उल्लेख गर्दै उनले संसद् पुनःस्थापना भए विगतमा भएका गलत अभ्यास सच्याउने अवसर बन्न सक्ने बताए ।

बस्नेतका अनुसार प्रतिनिधिसभा पुनःस्थापनाको विषयलाई एमालेले आगामी केन्द्रीय कमिटी बैठकमा छलफलको एजेन्डा बनाउनेछ ।

यसैबीच, निर्वाचनमा पार्टीले व्यहोरेको पराजय र बदलिँदो राजनीतिक परिस्थितिको समीक्षा गर्दै एमालेको संगठनलाई पुनर्गठन र सुदृढ बनाउने काम अघि बढिरहेको उनले बताए ।

जनतामा फैलिएका भ्रम चिर्न पार्टीलाई थप सक्रिय बनाउने, जनतासँग नियमित संवाद गर्ने तथा सामाजिक न्याय र समाजसेवाका काममा पार्टीको भूमिका बढाउने योजना रहेको उनको भनाइ छ ।

पार्टीको समीक्षा तथा पुनर्गठनका लागि गठित कार्यदल पार्टी अध्यक्षलाई हटाउने उद्देश्यले गठन गरिएको भन्ने प्रचार गलत भएको बस्नेतले स्पष्ट पारे ।

उनका अनुसार कार्यदललाई निर्वाचनको समीक्षा गर्नुका साथै बदलिएको राजनीतिक परिस्थितिअनुसार पार्टीलाई अघि बढाउने र संगठन पुनर्गठन गर्ने जिम्मेवारी दिइएको हो।