काठमाडौं । नेपाली कांग्रेसको संस्थापनइतर पक्षीय नेता डा. शशांक कोइरालाले पाँचथरमा डेकेन्द्रकुमार तामाङलाई संयोजक तोकेको छ । तामाङ पार्टीको जिल्ला सचिव हुन् ।

गत साउनको अन्तिम साता शेरबहादुर देउवा हङकङदेखि स्वदेश फर्किँदा स्वागत गर्न पुगेका तामाङ त्यसयता कोइराला खेमामा प्रष्टसँग खुलेका छन् ।

उनलाई पाँचथरका कतिपय नेताको राय सुझाव र केन्द्रीय प्रतिनिधि सूर्यकुमार दाहालको सिफारिसमा पाँचथर जिल्ला संयोजक तोकेको डा. कोइरालाले बताएका छन् ।

उनका अनुसार १५ असोजदेखि ४ मंसिरसम्ममा प्रदेश अधिवेशनहरू सम्पन्न गर्नुपर्ने छ । तिनै विभिन्न तहका अधिवेशन सम्पन्न गर्नेगरी तामाङलाई संयोजक तोकिएको कोइरालाले गरेको परिपत्रमा उल्लेख छ ।

डा. कोइरालाले कांग्रेसको स्थापित मूल्यमान्यताअनुसार संयोजक तामाङले संगठन विस्तार गर्ने विश्वास लिएको समेत बताए ।