जनकपुरधाम । जनकपुरधामस्थित मधेश स्वास्थ्य विज्ञान प्रतिष्ठान, प्रादेशिक अस्पतालको बर्थिङ सेन्टरमा कार्यरत चिकित्सकमाथि हातपात गरेको आरोपमा चर्चित टिकटक प्रयोगकर्ता सुधिरा मुखियासहित दुई जना पक्राउ परेका छन्।

पक्राउ पर्नेमा जनकपुरधाम उपमहानगरपालिका–८ का २६ वर्षीय सुधिरा मुखिया बिन र औरही गाउँपालिका–२ का २० वर्षीय विजय मुखिया छन्। जिल्ला प्रहरी कार्यालय धनुषाका अनुसार उनीहरूलाई ड्युटीमा रहेका चिकित्सक डा. सरोज साहमाथि हातपात गरेको आरोपमा पक्राउ गरिएको हो।

प्रहरीका अनुसार बर्थिङका लागि अस्पताल आएकी महिलाका आफन्तले चिकित्सकमाथि हातपात गरेको सूचना पाएपछि प्रहरी टोली अस्पताल पुगेको थियो। घटनामा संलग्न रहेको आरोपमा दुवै जनालाई नियन्त्रणमा लिइएको हो।

दुवै जनालाई जिल्ला अदालत धनुषाबाट तीन दिनको म्याद थप गरी अनुसन्धान भइरहेको प्रहरी प्रवक्ता डीएसपी ओमप्रकाश खनालले बताए।

सुधिरा टिकटकमा सक्रिय छन्। उनले जनकपुरधामको बजरंग चोकमा होटलसमेत सञ्चालन गर्दै आएको प्रहरीले जनाएको छ।

उनीहरूमाथि स्वास्थ्यकर्मी तथा स्वास्थ्य संस्थाको सुरक्षासम्बन्धी ऐन, २०६६ को दफा ३(ग) अनुसार अनुसन्धान भइरहेको छ। उक्त कसुर पुष्टि भए तीन वर्षसम्म कैद वा तीन लाख रुपैयाँसम्म जरिवाना वा दुवै सजाय हुन सक्ने कानुनी व्यवस्था छ।

घटनामा संलग्न अन्य व्यक्तिको समेत पहिचान गरी खोजी भइरहेको धनुषा प्रहरीले जनाएको छ।