काठमाडौं । सर्लाहीको लालबन्दी नगरपालिका–१२, जियाजोरमा पोखरीमा डुबेर बेपत्ता भएका १५ वर्षीय बालक २० घण्टापछि मृत अवस्थामा फेला परेका छन्।

लालबन्दी नगरपालिका–११, हीरापुरका देवेन्द्र ठाकुरका छोरा राजु ठाकुर आइतबार अपराह्न करिब ४ः१५ बजेदेखि पोखरीमा डुबेर बेपत्ता भएका थिए।

लखन्देही खोला पारि निजी जग्गामा खनिएको खाल्डोमा जमेको पानीमा डुबेका उनको शव सोमबार दिउँसो करिब साढे १२ बजे फेला परेको इलाका प्रहरी कार्यालय लालबन्दीले जनाएको छ।

इलाका प्रहरी कार्यालय लालबन्दीका प्रहरी निरीक्षक श्याम थापा मगरका अनुसार नेपाल प्रहरी र सशस्त्र प्रहरीको संयुक्त गोताखोर टोलीले डुङ्गा तथा बाँसको सहयोगमा बालकको शव पानीबाट बाहिर निकालेको हो।

खोजीका लागि सशस्त्र प्रहरी बल नं. २ छिन्नमस्ता बाहिनी मुख्यालयबाट सशस्त्र प्रहरी नायब निरीक्षक भक्तबहादुर खत्रीको नेतृत्वमा सात सदस्यीय गोताखोर टोली सोमबार बिहानै घटनास्थल पुगेको थियो।

यसअघि आइतबार साँझ नेपाली सेना, नेपाल प्रहरी र सशस्त्र प्रहरीको टोलीले करिब तीन घण्टा खोजी गरे पनि बालक फेला परेका थिएनन्।

सोमबार बिहान पुनः गोताखोर टोली परिचालन गरी खोजी गर्दा बालकको शव फेला परेको प्रहरीले जनाएको छ।