काठमाडौं । असोज २३ गते नेपालमा प्रदर्शन हुने फिल्म ‘टनेल-२६ : द कर्स बिनिथ द माउन्टेन’को प्रचारप्रसारका लागि १६ सदस्यीय भुटानी टोली नेपाल आइपुगेको छ।
सोमबार बिहान नेपाल आइपुगेको टोलीमा फिल्मका निर्माता, कलाकार तथा प्राविधिक छन्। निर्माण पक्षका अनुसार थप पाँच जना सदस्य पनि नेपाल आउनेछन्।
नेपाल, भुटान र भारतको सहकार्यमा निर्माण भएको यो फिल्म जम्बी हरर विधामा आधारित छ। फिल्मको टिजर यसअघि नै सार्वजनिक भइसकेको छ भने मंगलबार काठमाडौंमा आयोजित कार्यक्रममा ट्रेलर सार्वजनिक गरिँदैछ। सोही कार्यक्रममा सहभागी हुन भुटानी टोली नेपाल आएको हो।
टोलीको नेतृत्व फिल्मका निर्माता तथा अभिनेता संगय छेल्ट्रिमले सञ्चारकर्मीसँग कुरा गर्दै उनले फिल्म निर्माणमा एक वर्षभन्दा बढी समय लागेको र नेपाल-भुटान सहकार्यको यो फिल्म अन्तर्राष्ट्रिय दर्शकमाझ पुर्‍याउने लक्ष्य रहेको बताए।
फिल्मका लेखक, निर्देशक तथा सम्पादक डीडी किन्लेले पनि फिल्म प्रदर्शनलाई लिएर आफूहरू उत्साहित रहेको बताए। साथै, उनले नेपाल र भुटानबीचको सहकार्यलाई निरन्तरता दिन यस्ता फिल्मले सहयोग पुग्ने विश्वास व्यक्त गरे।
फिल्ममा संगय छेल्ट्रिम, अनुपविक्रम शाही, आना शर्मा, निदुप दोर्जी, डेकी लामो, फुन्टशोक धोन्डेन र रोशनी दादालगायत कलाकारको अभिनय छ। दोर्जी वाङ्चुक कार्यकारी निर्माता तथा प्रदीप खड्का क्रिएटिभ प्रोड्युसरका रूपमा रहेका छन्।
त्यस्तै, भारतीय फिल्ममेकर प्रशान्त कुमार गुप्तासहित विभिन्न निर्माता फिल्मको निर्माणमा सहभागी छन्।
भुटानको मिडिया, क्रिएटिभ इन्डस्ट्री तथा इन्टेलेक्चुअल प्रोपर्टी विभागले पनि फिल्मलाई सहयोग गरेको निर्माण पक्षले जनाएको छ।