काठमाडौं। विद्युत् महसुलमा दिइएको भ्याट छुट फिर्ता गर्ने विषयमा अर्थमन्त्री डा. स्वर्णिम वाग्लेको नाम जोडेर भइरहेको प्रचारप्रति उनको सचिवालयले स्पष्टीकरण दिएको छ।

सचिवालयले विद्युत् महसुलको भ्याट छुट फिर्ता गर्ने विषयमा अहिलेसम्म कुनै निर्णय नभएको स्पष्ट पारेको छ।

मंगलबार जारी विज्ञप्तिमा अर्थमन्त्री वाग्लेले आइतबार साँझ वा गत साता यस विषयमा कुनै भेटघाट वा छलफल नगरेको जनाइएको छ।

विद्युत् महसुलमा दिइएको छुट फिर्ता गर्ने विषयमा अर्थमन्त्रीसँग छलफल भएर सैद्धान्तिक सहमति जुटेको भन्ने प्रचारमा कुनै सत्यता नरहेको सचिवालयको भनाइ छ।

तर उपभोक्तालाई राहत दिने विषयमा सम्बन्धित निकायबीच छलफल र अध्ययन भने भइरहेको सचिवालयले जनाएको छ।

सचिवालयले विद्युत् भ्याटसम्बन्धी निर्णय भइसकेको भन्दै भइरहेको प्रचार तथ्यमा आधारित नभएको स्पष्ट पारेको हो।