एजेन्सी इरानका विदेशमन्त्री अब्बास अराघ्ची संयुक्त राष्ट्रसंघको महासभामा सहभागी हुन सोमबार न्युयोर्क पुगेका छन्।

इरानी विदेश मन्त्रालयका अनुसार अराघ्चीले महासभामा सहभागी इरानी कूटनीतिक प्रतिनिधिमण्डलको नेतृत्व गर्नेछन्।

न्युयोर्क पुगेपछि उनले संयुक्त राष्ट्रसंघका महासचिव एन्टोनियो गुटेरेससँग टेलिफोन संवाद गरेका छन्। महासभाको कार्यसूची र विभिन्न अन्तर्राष्ट्रिय विषयमा कुराकानी भएको इरानी पक्षले जनाएको छ।

महासभालाई इरानले आफ्ना नागरिकको अधिकार र राष्ट्रिय हितबारे अन्तर्राष्ट्रिय समुदायसमक्ष धारणा राख्ने महत्वपूर्ण मञ्चका रूपमा लिएको छ।

यसअघि इरानी राष्ट्रपति मसुद पेजेस्कियानले नै प्रतिनिधिमण्डलको नेतृत्व गर्ने बताइएको थियो। तर पछि विदेश मन्त्रालयका प्रवक्ता इस्माइल बाघाईले अराघ्चीले प्रतिनिधिमण्डलको नेतृत्व गर्ने जानकारी दिएका हुन्।

अराघ्चीले महासभाका क्रममा विभिन्न देशका अधिकारी तथा विदेशमन्त्रीसँग भेटवार्ता गर्ने कार्यक्रम छ। क्षेत्रीय तथा अन्तर्राष्ट्रिय परिस्थितिसहित पारस्परिक चासोका विषयमा छलफल हुने बताइएको छ।

अमेरिकाले पनि इरानी प्रतिनिधिमण्डललाई महासभामा सहभागी हुन अनुमति दिएको छ। तर न्युयोर्क बसाइका क्रममा प्रतिनिधिमण्डलमाथि केही विशेष प्रावधान लागू हुने अमेरिकी विदेश मन्त्रालयले जनाएको छ।

अराघ्चीको न्युयोर्क आगमनसँगै इरान-अमेरिका तनावबीचको कूटनीतिक गतिविधि पनि बढेको छ।

इरानले रणनीतिक रूपमा महत्वपूर्ण होर्मुज जलडमरूमध्यबाट तेल तथा ग्यास ढुवानी पुनः सञ्चालन गर्न अमेरिकासमक्ष केही सर्त राखेको जनाएको छ। ती सर्त कतारमार्फत अमेरिकासम्म पुर्‍याइएको इरानी दाबी छ।

इरानले यसअघि युद्ध र प्रतिबन्धसँग जोडिएका विषयमा आफ्नो अडान सार्वजनिक गर्दै आएको छ। अर्कोतर्फ अमेरिकाले इरानी बन्दरगाहसँग सम्बन्धित प्रतिबन्धात्मक कदम अघि बढाइरहेको जनाएको छ।

यही पृष्ठभूमिमा संयुक्त राष्ट्रसंघको महासभामा अराघ्चीका भेटवार्ता र इरानको कूटनीतिक प्रस्तुतिलाई चासोका साथ हेरिएको छ।

अराघ्ची आइतबार साँझ इरानबाट न्युयोर्कका लागि प्रस्थान गरेका थिए। न्युयोर्क पुग्नुअघि उनले कतारमा छोटो समय बिताएका थिए।