काठमाडौं । बङ्गालको खाडीमा बनेको ‘डीप डिप्रेसन’ पश्चिमतर्फ अघि बढिरहेको छ। पछिल्लो ६ घण्टामा यो प्रणाली करिब १२ किलोमिटर प्रतिघण्टाको गतिमा पश्चिमतर्फ सरेको हो।

बुधबार बिहान ५ः३० बजे उक्त प्रणाली आन्ध्र प्रदेशको कलिङ्गपट्टनमबाट करिब ७० किलोमिटर टाढा समुद्रमा रहेको भारतीय मौसम विज्ञान विभागले जनाएको छ।

मौसम विभागका अनुसार बुधबार रातिसम्म यो प्रणाली उत्तर आन्ध्र प्रदेश र दक्षिण ओडिशाको तटबीच पर्ने कलिङ्गपट्टनम आसपासबाट तटमा प्रवेश गर्ने सम्भावना छ।

‘डीप डिप्रेसन’ समुद्रमा बन्ने न्यून चापीय प्रणालीको शक्तिशाली अवस्था हो। यससँगै तीव्र हावाहुरी र भारी वर्षा हुने गर्छ।

यसको प्रभावका कारण भारतका विभिन्न क्षेत्रमा भारी वर्षाको सम्भावना देखिएको छ।

मध्य प्रदेशका छिन्दवाडा, सिवनी र बालाघाटमा बुधबार भारी वर्षाको चेतावनी दिइएको छ। बिहारका सबै ३८ जिल्लामा पनि वर्षाको सम्भावनालाई ध्यानमा राख्दै पहेँलो सतर्कता जारी गरिएको छ।

मौसम प्रणालीको प्रभावसँगै ती क्षेत्रमा हावाहुरी र वर्षाको गतिविधि बढ्न सक्ने मौसम विभागले जनाएको छ।

भारतको राजस्थानमा भने अवस्था फरक देखिएको छ। वर्षा रोकिएपछि त्यहाँ तापक्रम बढेको छ।

जैसलमेरमा तापक्रम ४१ डिग्री सेल्सियस पुगेको छ। बीकानेर र बाडमेरमा पनि तापक्रम ४० डिग्री सेल्सियसभन्दा माथि पुगेको छ।

सेप्टेम्बरमै मे महिनाको जस्तो गर्मी महसुस हुन थालेको स्थानीय सञ्चारमाध्यमहरूले जनाएका छन्।

मौसम विभागका अनुसार राजस्थानमा आगामी चारदेखि पाँच दिन मौसम मुख्यतः सुक्खा रहने सम्भावना छ। यस अवधिमा तापक्रम अझै बढ्न सक्ने पूर्वानुमान गरिएको छ।