काठमाडौं । असोज २ गतेबाट प्रदर्शनमा आएको सिनेमा ‘झिँगेदाउ २’ दोस्रो सातामा पनि दर्शक तान्न सफल भएको छ।

पहिलो सातामै राम्रो व्यापार गरेको सिनेमाले दोस्रो साताको शनिबार पनि हलमा दर्शकको उपस्थिति कायम राखेको निर्माण पक्षले जनाएको छ। वितरकका अनुसार शनिबार केही हलमा शो संख्या समेत थपिएको छ।

निर्माण टिमको दाबीअनुसार सिनेमाले पहिलो सातामा करिब डेढ करोड रुपैयाँको व्यापार गरेको छ। दोस्रो सातामा पनि दर्शकको चाप देखिएपछि निर्माण पक्ष उत्साहित बनेको छ।

सिनेमा हेरेर फर्किएका दर्शकले कथा, कलाकारको अभिनय, प्रस्तुति र गीतसंगीतको प्रशंसा गरेको निर्माण पक्षको भनाइ छ। पारिवारिक सम्बन्धभित्र देखिने झगडा, मनमुटाव र त्यसले निम्त्याउने परिस्थितिलाई मनोरञ्जनात्मक शैलीमा प्रस्तुत गरिएकाले दर्शकले रुचाएको उनीहरूको दाबी छ।

सामाजिक सञ्जालमा आएका प्रतिक्रियामा पनि सिनेमाका केही दृश्यले दर्शकलाई हँसाएको र केही दृश्यले भावुक बनाएको उल्लेख छ।

ज्ञानेन्द्र देउजाको निर्देशन रहेको सिनेमाको कथा जेठानी र देउरानीबीचको विवादबाट सुरु हुने पारिवारिक कलहमा केन्द्रित छ। सामान्य देखिने घरायसी विवाद कसरी ठूलो द्वन्द्वमा परिणत हुन्छ र त्यसले पारिवारिक सम्बन्धमा कस्तो असर पार्छ भन्ने विषयलाई सिनेमाले मनोरञ्जनसँग जोडेको छ।

सिनेमाले पारिवारिक द्वन्द्वसँगै आमाको भूमिका, माया र त्यागलाई पनि कथाको महत्वपूर्ण हिस्साका रूपमा प्रस्तुत गरेको छ। यही भावनात्मक पक्षले दर्शकलाई कथासँग जोडेको निर्माण पक्षको दाबी छ।

सिनेमामा केकी अधिकारी, आँचल शर्मा, महेश त्रिपाठी, कुशल बिष्ट, आर्यन सिग्देल, हिउँवाला गौतम, सरोज खनाल, बसुन्धरा भुसाल, चैत्यदेवी सिंह, संगम भण्डारी, विजय देउजा, अंशु महर्जन, अभयराज बराल, उत्तम केसी र आशा भुसाललगायत कलाकारले अभिनय गरेका छन्।

परिच्छेद सेनको पटकथा तथा संवाद रहेको सिनेमामा गोविन्द फुयाँल र शिशिर चालिसेको लेखन छ।

कपनगढी सिनेमा प्रालि र फिल्म क्रिउ नेपाल प्रालिको ब्यानरमा बनेको सिनेमामा सुलभ प्रतिक देउजा र समीक्षा देउजाको लगानी छ। रोशनी अधिकारी देउजा र नीतु श्रेष्ठ देउजा सहनिर्माता हुन्।

विष्णु घिमिरे ‘कल्पित’को छायांकन रहेको सिनेमालाई मित्र डी गुरुङले सम्पादन गरेका छन्। अर्जुन पोखरेलको संगीत र रोशन श्रेष्ठको एक्सन निर्देशन रहेको छ।