काठमाडौं। श्रम संस्कृति पार्टीका सांसद ध्रुवराज राईले सरकारको कामकारबाहीप्रति प्रश्न उठाउँदै पूर्वप्रधानन्यायाधीश चोलेन्द्रशमशेर जबरालाई पक्राउ गर्ने र छाड्ने घटनाले सरकारको गतिविधि केटाकेटी खेलेजस्तो देखिएको टिप्पणी गरेका छन्।

सोमबार प्रतिनिधिसभाको बैठकमा बोल्दै राईले पछिल्ला घटनामा सरकारको व्यवहार लुकिछिपी गर्ने खालको देखिएको बताए।

‘सरकारलाई हाम्रो सल्लाह छ, यो केटाकेटी खेलेजस्तो र लुकिछिपी गरेजस्तो गतिविधि भइरहेको छ कि। घरी भरत दाहाल पक्रियो, छाडियो। घरी चोलेन्द्रशमशेर पक्रियो, छोडियो,’ उनले भने, ‘विषय गम्भीर छ भने सिरियसली लाग्नुहोला।’

राईले लामो समयदेखि प्रधानमन्त्रीसँग प्रत्यक्ष प्रश्न राखेर जवाफ लिन खोजिरहेको भन्दै प्रधानमन्त्रीको प्रश्नोत्तर कार्यक्रम सञ्चालन गर्न पनि माग गरे।

‘लामो समयदेखि प्रधानमन्त्रीको उत्तरको प्रतीक्षामा प्रश्न बोकेर बसेका छौँ,’ उनले भने।

राई भोजपुर–१ बाट प्रतिनिधिसभामा निर्वाचित श्रम संस्कृति पार्टीका सांसद हुन्।