काठमाडौं । नेकपा एमालेका सांसद ऐन महरले सरकारले कानुनको शासन उल्लंघन गर्दै नागरिकलाई प्रतिशोधका आधारमा पक्राउ गर्ने र तर्साउने काम गरिरहेको आरोप लगाएका छन्।

प्रतिनिधिसभाको बैठकमा बोल्दै महरले पूर्वप्रधानन्यायाधीश चोलेन्द्रशमशेर जबरालाई सरकारले गैरकानुनी तरिकाले पक्राउ गरेको दाबी गरे। उनले सरकारमाथि राजनीतिक प्रतिशोधका आधारमा नागरिकलाई दुःख दिने काम भइरहेको आरोप लगाए।

‘सरकारले कानुनको शासनको उल्लंघन गरिरहेको छ। चोलेन्द्रशमशेरलाई गैरकानुनी तरिकाले सरकारले पक्राउ गर्‍यो,’ उनले भने, ‘सरकारले पटक–पटक प्रतिशोधका आधारमा नागरिकलाई तर्साउने काम गरेको छ।’

महरले पूर्वप्रधानमन्त्री तथा एमाले अध्यक्ष केपी शर्मा ओली र एमाले उपाध्यक्ष विष्णु पौडेलको पक्राउको प्रसंगसमेत उठाए। ओलीलाई ‘गुण्डा शैलीमा, अपहरण शैलीमा’ पक्राउ गरेर मानव अधिकार उल्लंघन गरिएको उनको आरोप थियो।

‘कहिले पूर्वप्रधानमन्त्री केपी ओलीलाई नै गुण्डा शैलीमा, अपहरण शैलीमा मानव अधिकार उल्लंघन गर्दै पक्राउ गर्‍यो। नेकपा एमालेका उपाध्यक्ष विष्णु पौडेललाई त्यसैगरी पक्राउ गर्‍यो,’ उनले भने।

सरकारले ‘गुण्डागर्दी र आतंक’ मच्चाइरहेको आरोप लगाउँदै महरले पछिल्लो गतिविधिले सरकारप्रति प्रश्न उठेको बताए।

उनले सरकारले जेनजी आन्दोलनलाई समेत बदनाम गर्ने गरी काम गरिरहेको आरोप लगाए। ‘जेनजीलाई चाहिँदाको भाँडो नचाहिँदाको ठान्डोजस्तो गर्‍यो सरकारले,’ महरले भने।