काठमाडौं । प्रदर्शनरत नेपाली चलचित्रका १५-२० मिनेटसम्मका दृश्य टिकटक र फेसबुकमा सार्वजनिक हुन थालेपछि चलचित्र क्षेत्रको लगानी र प्रतिलिपि अधिकारमा चुनौती थपिएको छ। यसप्रति अभिनेता तथा निर्देशक निखिल उप्रेतीले आपत्ति जनाउँदै फिल्मका दृश्य अपलोड नगर्न दर्शकलाई आग्रह गरेका छन्।

निखिलको फिल्म ‘आचार्य’का लामा दृश्य सामाजिक सञ्जालमा फैलिन थालेपछि उनले भिडियोमार्फत निर्माताको लगानी र मेहनतको सम्मान गर्न अपिल गरेका हुन्।

नेपाली चलचित्र निर्माणमा ठूलो आर्थिक लगानी, कलाकार तथा प्राविधिकको श्रम र वर्षौँको मेहनत जोडिने भन्दै उनले केही भ्युज र लाइकका लागि फिल्मका महत्त्वपूर्ण दृश्य सार्वजनिक नगर्न आग्रह गरेका छन्।

त्यस्तै, चलचित्र विकास बोर्डले पनि प्रदर्शनरत नेपाली फिल्मका मुख्य अंश अनधिकृत रूपमा अपलोड नगर्न सचेत गराउँदै आएको छ। हलभित्र मोबाइल वा क्यामेराबाट फिल्म रेकर्ड गरी सामाजिक सञ्जालमा अपलोड गर्नु प्रतिलिपि अधिकारसँग जोडिएको विषय हो।

प्रतिलिपि अधिकार ऐन, २०५९ अनुसार अनुमति नलिई चलचित्रको अंश प्रतिलिपि बनाउने, वितरण गर्ने वा सार्वजनिक गर्ने कार्यमा कसुरको प्रकृतिअनुसार जरिवाना, क्षतिपूर्ति तथा उपकरण जफत हुन सक्ने व्यवस्था छ।

साथै, टिकट काटेर हेर्नुपर्ने फिल्मका लामा दृश्य निःशुल्क सार्वजनिक हुँदा निर्माताको लगानी र सिर्जनामाथि असर पर्न सक्ने भएकाले निखिलले दर्शकलाई जिम्मेवार बन्न आग्रह गरेका छन्।