काठमाडौं । मनाङको चामेमा पहिरो र लेदोसहितको बाढीका कारण थुनिएको मर्स्याङ्दी नदीलाई विस्फोट गराएर खोल्ने तयारी गरिएको छ।

जिल्ला प्रशासन कार्यालय मनाङका सहायक प्रमुख जिल्ला अधिकारी कृष्णप्रसाद पौडेलका अनुसार जिल्ला दैवी प्रकोप उद्धार समितिले नदीको अवरोध हटाउन विस्फोट गर्ने निर्णय गरेको हो।

त्त्यस्तै,  विस्फोट लागि नेपाली सेनासँग प्राविधिक टोली पठाइदिन अनुरोध गरिएको छ। काठमाडौं‌बाट सेनाको विस्फोटक पदार्थसम्बन्धी प्राविधिक टोली आएर थुनिएको नदी आजै खोल्ने तयारी रहेको पौडेलले बताए।

विस्फोटका लागि आवश्यक सामग्री भने मनाङकै स्थानीय तहसँग रहेको प्रशासनले जनाएको छ।

आइतबार ठाडो खोला र घट्टे खोलामा आएको बाढीले चामे क्षेत्रमा कटान गर्नुका साथै घर, पुल र सडकमा क्षति पुर्‍याएको थियो। साँझ घट्टे खोलातर्फबाट आएको पहिरोको लेदो र हिलो मर्स्याङ्दी नदीमा थुप्रिएपछि नदीको बहाव अवरुद्ध भएको थियो।

नदी थुनिएपछि चामेका स्थानीय त्रसित बनेका थिए। सम्भावित जोखिमबाट बच्न उनीहरू जंगल, सामुदायिक भवन र ब्यारेकमा गएर रात बिताएका थिए।

साथै, मौसम खुलेपछि भने स्थानीयहरू सोमबार बिहानै घर फर्किएका छन्। स्थानीय खोलामा बाढी रोकिए पनि मर्स्याङ्दीको अवरोध अझै हटेको छैन। नदीको सतह तत्काल बढिरहेको नदेखिए पनि जोखिम दोहोरिन सक्ने भएकाले अवरोध हटाउन लागिएको प्रशासनले जनाएको छ।