काठमाडौं । सरकारले संसद्मा दर्ता गरेको संघीय निजामती सेवा विधेयकमा महिला कर्मचारीका लागि महिनावारी अर्थात् रजस्वला बिदाको व्यवस्था प्रस्ताव गरिएको छ।

‘संघीय निजामती सेवासम्बन्धी कानुनलाई संशोधन र एकीकरण गर्न बनेको विधेयक’को बुँदा नम्बर १२५ मा निजामती कर्मचारीले पाउने बिदाको सूचीमा ‘महिनावारी/रजस्वला बिदा’ थप्ने प्रस्ताव गरिएको हो।

हाल प्रचलित व्यवस्थामा महिला कर्मचारीका लागि बिरामी, प्रसूति तथा प्रसूति स्याहार बिदालगायतका सुविधा रहे पनि छुट्टै महिनावारी बिदाको व्यवस्था छैन।

विधेयक संसद्बाट पारित भएर ऐनका रूपमा कार्यान्वयनमा आएमा सरकारी सेवामा कार्यरत महिला कर्मचारीले महिनावारीका समयमा छुट्टै बिदा लिन पाउनेछन्।

साथै, प्रस्तावित व्यवस्थाले सरकारी सेवामा कार्यरत महिलाको स्वास्थ्य र कार्यस्थलसँग सम्बन्धित आवश्यकतालाई सम्बोधन गर्ने अपेक्षा गरिएको छ।