काठमाडौं । नेपाली कांग्रेसका सांसद नरेन्द्रकुमार केरुङले करोडौँ खर्च गरेर बनाइएका आधारभूत अस्पतालहरूमा चिकित्सक, स्वास्थ्यकर्मी, उपकरण र औषधि नहुँदा भवनमै सीमित भएको भन्दै सरकारको ध्यानाकर्षण गराएका छन्।

शुक्रबार प्रतिनिधिसभाको विशेष समयमा बोल्दै केरुङले ग्रामीण क्षेत्रका नागरिकले आधारभूत स्वास्थ्य सेवा लिनसमेत सास्ती खेप्नुपरेको बताए।

संघीय सरकारले ६५७ वटा आधारभूत अस्पताल निर्माण गर्ने योजना अघि सारे पनि भवन बनेपछि सेवा सञ्चालनको जिम्मेवारी र स्रोत व्यवस्थापनमा सरकारहरूबीच स्पष्ट समन्वय हुन नसकेको उनको भनाइ थियो।

‘हामीले अस्पताल बनायौँ कि भवन मात्रै?’ भन्दै उनले प्रश्न गरे, ‘स्थानीय तहसँग अस्पताल चलाउने पर्याप्त स्रोत छैन, चिकित्सक र स्वास्थ्यकर्मीको दरबन्दी छैन भने भवन बनाएर मात्रै नागरिकले उपचार कसरी पाउँछन्?’

आफ्नो निर्वाचन क्षेत्र पाँचथरका ग्रामीण बस्तीको स्वास्थ्य अवस्थासमेत उनले सदनमा प्रस्तुत गरे। अस्पताल बने पनि आवश्यक जनशक्ति र उपचार सामग्री नहुँदा स्थानीयले अपेक्षित सेवा पाउन नसकेको उनले बताए।

महालेखा परीक्षकको प्रतिवेदनमा समेत निर्माण सम्पन्न भएका कतिपय अस्पताल आवश्यक जनशक्ति र उपकरणको अभावमा प्रभावकारी रूपमा सञ्चालन हुन नसकेको विषय औंल्याइएको उनले स्मरण गराए।

केरुङले संघ, प्रदेश र स्थानीय तहबीच स्वास्थ्य सेवासम्बन्धी जिम्मेवारी स्पष्ट पार्नुपर्ने बताए। ग्रामीण क्षेत्रमा निर्माण भएका आधारभूत अस्पताललाई तत्काल चिकित्सक, स्वास्थ्यकर्मी, औषधि र आवश्यक उपकरण उपलब्ध गराएर सञ्चालनमा ल्याउनुपर्ने उनको माग छ।

नागरिकको स्वास्थ्य सेवाको अधिकार कागजमा मात्रै नभई व्यवहारमै सुनिश्चित गर्नुपर्ने भन्दै उनले सरकारसमक्ष १० बुँदे प्रश्न र ७ बुँदे ठोस प्रस्तावसमेत प्रस्तुत गरेका छन्।