रसुवा । बाढी तथा पहिरोबाट प्रभावित नागरिकलाई स्वास्थ्य सेवा उपलब्ध गराउने उद्देश्यले रसुवाको उत्तरगया गाउँपालिकामा निःशुल्क स्वास्थ्य तथा दन्त शिविर सुरु भएको छ।

रसुवा सामुदायिक विकास र सीईटीओपी अस्ट्रेलियाको आयोजनामा तथा उत्तरगया गाउँपालिकाको समन्वयमा शनिबारदेखि शिविर सञ्चालनमा आएको हो। विपद्पछि प्रभावित समुदायमा स्वास्थ्य सेवाको पहुँच सहज बनाउने उद्देश्यले शिविर आयोजना गरिएको आयोजकले जनाएको छ।

उत्तरगया गाउँपालिका–५ लहरेपौवास्थित श्री शिवालय आधारभूत विद्यालयबाट सुरु भएको शिविरमा बाढी तथा पहिरो प्रभावित क्षेत्रका नागरिकसँगै स्थानीय बासिन्दालाई लक्षित गरिएको छ। शिविरमा स्वास्थ्य परीक्षण, दन्त उपचार, स्वास्थ्य परामर्श र आवश्यक औषधि निःशुल्क उपलब्ध गराइएको छ।

दुई दिन सञ्चालन हुने दन्त शिविरमा दाँत तथा मुख स्वास्थ्य परीक्षण, दाँत भर्ने, फुकाल्ने तथा आवश्यक परामर्श सेवा दिइँदैछ। अनुभवी चिकित्सकबाट स्वास्थ्य परीक्षण र परामर्शका साथै दीर्घरोगलगायत समस्याका कारण नियमित औषधि सेवन गरिरहेका बिरामीलाई आवश्यक औषधिसमेत निःशुल्क उपलब्ध गराइने आयोजकले जनाएको छ।

छ दिनसम्म सञ्चालन हुने शिविरअन्तर्गत असोज १९ र २० गते जिबजिबे तथा असोज २१ र २२ गते धुन्चेमा स्वास्थ्य तथा दन्त शिविर सञ्चालन गरिनेछ।

शिविरमार्फत बाढी तथा पहिरो प्रभावित नागरिकसँगै स्थानीय समुदायलाई आवश्यक स्वास्थ्य सेवा उपलब्ध गराउँदै प्रभावित क्षेत्रमा स्वास्थ्य सेवाको पहुँच विस्तार गर्ने लक्ष्य राखिएको छ।