काठमाडौं । नेपाल, भुटान र भारतको सहकार्यमा बनेको चलचित्र ‘टनेल २६ः द कर्स बिनिथ द माउन्टेन’ को पूर्वनिर्धारित प्रदर्शन रोकिएको छ। असोज २३ गते अर्थात् अक्टोबर ९ देखि नेपाल र भुटानमा प्रदर्शन गर्ने तयारी गरिएको चलचित्र अब विश्वव्यापी रूपमा रिलिज गरिने भएको छ।

निर्माण पक्षका अनुसार चलचित्रको ग्रान्ड प्रिमियरमा प्राप्त सकारात्मक प्रतिक्रियापछि दुई देशमा मात्र प्रदर्शन नगरी अन्तर्राष्ट्रिय बजारमा समेत एकसाथ पुर्‍याउने निर्णय गरिएको हो।

अब चलचित्र नेपाली, भुटानी, हिन्दी र अंग्रेजी भाषामा विभिन्न देशमा प्रदर्शन गर्ने तयारी भइरहेको छ। त्यसका लागि आवश्यक प्रक्रिया र व्यवस्थापन पूरा भएपछि नयाँ प्रदर्शन मिति सार्वजनिक गरिने निर्माण टिमले जनाएको छ।

‘टनेल २६’ निर्माणमा डोर्जिस प्रोडक्सन, रेल्टिक पिक्चर्स र रोलिङ इमेज पिक्चर्सको सहकार्य रहेको छ। निर्माण पक्षबाट दोर्जी वाङ्चुक, प्रशान्त कुमार गुप्ता, कृष्ण गुप्ता र डीडी किन्ले जोडिएका छन्। दोर्जी वाङ्चुक कार्यकारी निर्माता हुन् भने प्रदीप खड्का क्रिएटिभ प्रोड्युसरका रूपमा रहेका छन्। चलचित्र निर्माणमा सिजी ग्रुपका निर्वाण चौधरी पनि सहभागी छन्।

चलचित्रको लेखन, निर्देशन र सम्पादन डीडी किन्लेले गरेका हुन्। यसमा सङ्गे छेल्ट्रिम, अनुपविक्रम शाही, आना शर्मा, निदुप दोर्जी, डेकी लामो, फुन्टशोक धोन्डेन र रोशनी दादाको अभिनय छ।

चलचित्रको छायांकन दीर्घ गुरुङ र सङ्गे टी. तेन्जिङले गरेका छन् भने द्वन्द्व निर्देशन राजु तामाङको छ। कृष्ण शर्माले निर्माण डिजाइनको जिम्मेवारी सम्हालेका छन्। त्यस्तै, पेमा लामो निर्माण व्यवस्थापन र ब्लु छेरिङ दोर्जी मेकअप तथा पोसाक व्यवस्थापनमा संलग्न छन्।

चलचित्रमा टेरड्साक जानपानको संगीत र करण थामावोङको ध्वनि रहेको छ। व्यवस्थापनतर्फ लिभेन्ट्स स्टुडियो र सन्तोष कुमार कार्की पनि जोडिएका छन्।

तय भइसकेको प्रदर्शन स्थगित गर्नुपरेकोमा निर्माण पक्षले दर्शक, सञ्चारकर्मी, चलचित्र प्रदर्शक र शुभेच्छुकसँग क्षमायाचना गरेको छ। चलचित्रप्रति दर्शकले देखाएको माया, उत्साह र विश्वासका लागि पनि टोलीले आभार व्यक्त गरेको छ।

निर्माण पक्षले ‘टनेल २६’ लाई अझ धेरै दर्शकमाझ पुर्‍याउने लक्ष्यसहित विश्वव्यापी प्रदर्शनको तयारी अघि बढाएको जनाएको छ। नयाँ प्रदर्शन मिति भने आवश्यक व्यवस्थापन पूरा भएपछि सार्वजनिक गरिनेछ।