काठमाडौं। बुढीगण्डकी नदीमा आएको बाढीले गोरखाको चुमनुब्री गाउँपालिकामा ३५ देखि ४० वटासम्म घर बगाएको प्रारम्भिक अनुमान गरिएको छ। बाढीले गाउँपालिकाका जगत बगर, सल्लेरी र घट्टेखोलाका घर बगाएको गाउँपालिकाका प्रशासनिक प्रमुख नारायणप्रसाद सापकोटाले जानकारी दिएका छन्।

गाउँपालिकाको केन्द्र सिर्दिबासमा रहेका सापकोटाका अनुसार बाढीको अवस्था अहिले सामान्य हुँदै गएको छ। उद्धार कार्य जारी रहेको र हेलिकप्टरमार्फत पनि उद्धार भइरहेको उनले बताए।

‘बाढीको अवस्थाचाहिँ सामान्य हुँदै गएको छ। अहिले उद्धारमा खटिएका छौं। हेलिकप्टर आएर उद्धार गरिरहेको छ,’ उनले भने।

यसैबीच, सिर्दिबासबाट चुम्लिङ अर्थात् चुम उपत्यकातर्फ जाने बाटोमा रहेका चारदेखि पाँच जना गोठाला सम्पर्कविहीन रहेको जनाइएको छ। उनीहरूको अवस्था र बाढीबाट भएको क्षतिको थप विवरण आउन बाँकी छ।