गोरखा । गोरखाको बुढीगण्डकीमा आइतबार बिहान आएको विनाशकारी बाढीको कारण पहिरोले खोला थुनेर बनाएको अस्थायी बाँध फुट्नु रहेको प्रारम्भिक विवरणले देखाएको छ।

सिरिङ्गे हिमालमा पहिरो खसेपछि बुढीगण्डकीमा मिसिने उइनगुलुङ खोला थुनिएको र त्यसपछि बाँध फुटेर लेदो तथा गेग्रानसहितको बाढी आएको सुरक्षाकर्मीले बताएका छन्।

आइतबार बिहान करिब साढे ५ बजे सिरिङ्गे हिमालतिर ठूलो आवाज आएको भन्दै स्थानीय होटल सञ्चालकले प्रहरीलाई खबर गरेका थिए। जिल्ला प्रहरी कार्यालय गोरखाका इन्स्पेक्टर आकाश कँडेलका अनुसार सूचना पाएलगत्तै चुनचेतबाट प्रहरी टोली घटनास्थलतर्फ परिचालन गरिएको थियो।

प्रहरी टोली प्रभावित क्षेत्रमा पुग्दा पहिरोले खोला थुनेर बनेको अस्थायी बाँध फुटिसकेको थियो। त्यसपछि आएको बाढीले पाँचवटा भेडीगोठ बगाएको इन्स्पेक्टर कँडेलले जानकारी दिएका छन्।

बाँध बनेको स्थान चुमनुब्री गाउँपालिका–६ अन्तर्गत लोक्पा र चुम्लिङको बीचमा पर्छ। उइनगुलुङ खोला बुढीगण्डकीमा मिसिने भएकाले त्यहाँ बनेको अस्थायी बाँध फुट्दा लेदो र गेग्रानसहितको ठूलो बहाव बुढीगण्डकीमा मिसिएको प्रहरीको भनाइ छ।

घटनापछि नेपाली सेनाका अधिकारीहरूले पनि हेलिकप्टरबाट प्रभावित क्षेत्रको निरीक्षण गरेका छन्। निरीक्षणपछि सेनाले पहिरोका कारण नदीको बहाव थुनिएर बाँध फुट्दा बाढी आएको विवरण राष्ट्रिय विपद् जोखिम न्यूनीकरण तथा व्यवस्थापन प्राधिकरणलाई दिएको छ।

पहिरोले खोला थुनेर अस्थायी बाँध बन्नु र त्यसपछि एक्कासि फुट्नुले हिमाली क्षेत्रमा पहिरो तथा नदीको बहावमा हुने परिवर्तनको जोखिम फेरि उजागर गरेको छ।