गोरखा। बूढीगण्डकी नदीमा आएको बाढीपछि जोखिममा परेका नागरिकको उद्धारमा नेपाली सेना परिचालित भएको छ।

बाढी र पहिरोको जोखिमबीच दुर्गम क्षेत्रमा फसेका ३६ जनालाई हेलिकप्टर र स्थलमार्गबाट सुरक्षित स्थानमा सारिएको छ।

आइतबार बिहान आएको बाढीबाट प्रभावित चुमनुब्री गाउँपालिकामा उद्धारका लागि एमआई–१७ हेलिकप्टर प्रयोग गरिएको थियो। हेलिकप्टरमार्फत चार जनाको उद्धार गरिएको सैनिक जनसम्पर्क तथा सूचना निर्देशनालयले जनाएको छ।

दुर्गम बस्तीमा पैदलमार्गबाट पुगेको सैनिक टोलीले पनि उद्धार अभियान चलाएको छ। जगतबाट छ जना, न्याक्फेदीबाट नौ जना, यारुबाट नौ जना र पायुबाट १२ जनालाई सुरक्षित स्थानमा पुर्‍याइएको छ।

उद्धार गरिएकामध्ये यारुबाट एक जना शिशु र एक जना विदेशी नागरिकसमेत रहेका छन्।

बाढी प्रभावित क्षेत्रमा जोखिम कायमै रहेकाले नेपाली सेनाले सशस्त्र प्रहरी बल र नेपाल प्रहरीसँग समन्वय गरेर खोज तथा उद्धार कार्य जारी राखेको जनाएको छ।