गोरखा । बुढीगण्डकी नदीमा आएको बाढीपछि चुमनुब्री गाउँपालिका–६, चुन्तेतका पाँच जना सम्पर्कविहीन भएका छन् । उनीहरू सिरिङ्गे हिमालको फेदीमा रहेको भेडीगोठमा बस्दै आएका थिए ।

जिल्ला प्रहरी कार्यालय गोरखाका अनुसार सम्पर्कविहीन हुनेमा ६५ वर्षीय सोनाम लामा, ५९ वर्षीया मोम्मो अजि लामा, ६६ वर्षीया सोम भुटी लामा, ७३ वर्षीय कर्मा लामा र ४१ वर्षीय पोमा दोर्जे लामा छन् ।

प्रहरीका अनुसार पहिरोले उइनगुलुङ खोलाको पानीको बहाव रोकेपछि बनेको अस्थायी बाँध फुटेको थियो । त्यसपछि एक्कासि उर्लिएको पानी बुढीगण्डकी नदीमा मिसिँदा बाढी आएको हो ।

बाढीपछि भेडीगोठमा रहेका पाँचै जनाको अवस्था अज्ञात छ । उनीहरूको खोजी तथा उद्धारबारे थप विवरण आउन बाँकी छ ।