काठमाडौं । बूढानीलकण्ठको बाल उद्धार माध्यमिक विद्यालयका प्रधानाध्यापक विनोद पण्डितमाथि विद्यालयभित्रै हातपात गरेको आरोपमा दुई जना पक्राउ परेका छन् ।

प्रहरीको प्रारम्भिक अनुसन्धानमा कुटपिटमा संलग्न निशान दाहाललाई विद्यालयका निवर्तमान अध्यक्ष ध्रुव घिमिरेले निर्देशन दिएको आशंका गरिएको छ ।

पक्राउ पर्नेमा सुनसरीको बराहक्षेत्र नगरपालिका–७ का ३६ वर्षीय निशान दाहाल र सिन्धुलीको दुधौली नगरपालिका–१ का ४४ वर्षीय ध्रुव घिमिरे छन् । दुवै जना हाल काठमाडौंको कपनमा बस्दै आएका थिए ।

गत बिहीबार बिहान साढे १० बजेतिर विद्यालय परिसरमै प्रधानाध्यापक पण्डितमाथि हातपात भएको थियो । घटनाको भिडियो सामाजिक सञ्जालमा फैलिएपछि विद्यालयभित्र भएको दुर्व्यवहारबारे चर्चा चुलिएको छ । दाहालले एक महिला शिक्षकमाथि समेत अश्लील शब्द प्रयोग गर्दै गालीगलौज र धम्की दिएको बताइएको छ ।

प्रहरीको प्रारम्भिक अनुसन्धानअनुसार पण्डितमाथि कुटपिट गर्न दाहाललाई घिमिरेले निर्देशन दिएको आशंका छ । स्रोतका अनुसार घिमिरे विद्यालयका निवर्तमान अध्यक्ष हुन् । केही दिनअघि उनी र प्रधानाध्यापक पण्डितबीच विवाद भएको थियो । त्यही विवादको बदला लिन घिमिरेले दाहाललाई परिचालन गरेको हुन सक्ने स्रोतको दाबी छ ।

यद्यपि, कुटपिटको निर्देशन र बदला लिने योजनासम्बन्धी विषय अनुसन्धानकै क्रममा छन् ।

प्रहरीले दुवै जनालाई जिल्ला प्रशासन कार्यालयबाट चार दिनको म्याद थप गरी अभद्र व्यवहार गर्न नहुने कसुरमा कारबाही प्रक्रिया अघि बढाएको जनाएको छ।