काठमाडौं । बुढीगण्डकी नदीमा आइतबार बिहानै आएको आकस्मिक बाढीपछि ५ जना सम्पर्कविहीन भएका छन् ।

जिल्ला प्रहरी कार्यालय गोरखाका अनुसार उत्तरी गोरखाको चुमनुब्री गाउँपालिका–६, चुम्चेतका ६५ बर्षीय सोनाम लामा, उनकी श्रीमती ५९ बर्षीया लाक्पा थोर्मा लामा, ६६ बर्षीया सोम भुटी लामा, ६८ बर्षीय कर्मा लामा र ४१ बर्षीय तेन दोर्जे लामा सम्पर्कविहीन छन् । उनीहरुको खोजी कार्य जारी रहेको प्रहरीले जनाएको छ ।

राष्ट्रिय विपद् प्राधिकरणका अनुसार ४५ वटा निजी घरमा पूर्ण क्षति पुगेको छ । २७ वटा घरमा आंशिक क्षति भएको छ । दुई वटा पक्की पुल र दुई वटा झोलुङ्गे पुल बाढीले बगाएको छ ।

तीन वटा जलविद्युत् परियोजनामा क्षति पुगेको छ । ९ जना विदेशीसहित ८२ जनाको हवाई उद्धार गरिएको छ ।
बाढी आउनुको कारण भने अझै खुलेको छैन ।