काठमाडौं । केयर गिभरका रूपमा इजरायल पठाइदिने भन्दै ठगी गरेको आरोपमा पक्राउ परेकी नेपाली कांग्रेसकी केन्द्रीय सदस्य उम्मेदवार विनिता खड्कालाई थुनाबाहिरै राखेर अनुसन्धान गर्न अदालतले आदेश दिएको छ ।

काठमाडौं जिल्ला अदालतका न्यायाधीश तेजबहादुर खड्काको इजलासले खड्कालाई थुनामा नराखी अनुसन्धान अघि बढाउन आदेश दिएको हो ।

प्रहरीको केन्द्रीय अनुसन्धान ब्युरो (सीआईबी)ले यस प्रकरणमा खड्कासहित पाँच जनालाई पक्राउ गरेको छ । पक्राउ पर्ने अन्यमा कांग्रेस नेता भरतप्रसाद चौलागाईं, दोलखाकी बालिका शिवाकोटी, ज्ञानबहादुर कार्की र शिवराम श्रेष्ठ रहेका छन् ।

अदालतले खड्कालाई थुनामा राखेर अनुसन्धान गर्नुपर्ने पर्याप्त आधार नदेखिएको ठहर गरेको छ । अन्य प्रतिवादीको बयानमा समेत खड्काको संलग्नताबारे स्पष्ट पोल खुलेको नदेखिएको र पीडितहरूले दिएको जाहेरीमा उनले रकम लिएको वा ठगीमा संलग्न रहेको पुष्टि गर्ने तथ्य उल्लेख नभएको आदेशमा जनाइएको छ ।

सीआईबीले सुरुमा पक्राउ परेका व्यक्तिहरूमाथि ठगीसम्बन्धी कसुरमा अनुसन्धान अघि बढाएको थियो । अनुसन्धानका क्रममा थप व्यक्तिको संलग्नता खुलेको र घटना संगठित रूपमा भएको देखिएपछि प्रहरीले संगठित अपराधको कसुरसमेत जोडेर अनुसन्धान विस्तार गरेको थियो ।

अदालतको आदेशले खड्कालाई थुनाबाहिर राखेर अनुसन्धान गर्न बाटो खुले पनि यसले उनीमाथिको अनुसन्धान अन्त्य भएको वा आरोपबाट सफाइ पाएको भने जनाउँदैन ।