काठमाडौं । बाँके क्षेत्र नम्बर ३ बाट निर्वाचित राष्ट्रिय स्वतन्त्र पार्टी (रास्वपा) का सांसद खगेन्द्र सुनारसँग जोडिएको भनिएको धम्कीपूर्ण अडियो सार्वजनिक भएपछि सम्बन्धित महिला र उनका नाबालक छोराको सुरक्षामा ध्यान दिन माग उठेको छ।

अडियोमा एक महिला सांसद तथा पूर्वराज्यमन्त्री र उनका छोरालाई अश्लील गालीगलौज गर्दै ज्यान मार्ने धम्की दिएको सुनिन्छ। सामग्री सार्वजनिक भएपछि सामाजिक सञ्जालमा सुनारको आलोचना भइरहेको छ।

सांसद रामकुमारी झाँक्रीले घटनाप्रति चिन्ता व्यक्त गर्दै सरकार र नेपाल प्रहरीलाई आमा–छोराको सुरक्षालाई पहिलो प्राथमिकतामा राख्न आग्रह गरेकी छन्। उनले यसलाई सामान्य व्यक्तिगत विवादका रूपमा मात्र लिन नहुने भन्दै महिला र बालकको सुरक्षासँग जोडिएको गम्भीर विषयका रूपमा हेर्नुपर्ने बताएकी छन्।

झाँक्रीले सामाजिक सञ्जालमार्फत अपराधमा संलग्न व्यक्तिमाथि कारबाही अघि बढाउनुअघि सम्भावित जोखिममा रहेका पीडितको सुरक्षा सुनिश्चित गर्नुपर्ने धारणा राखेकी छन्। प्रहरीले तत्काल आवश्यक सुरक्षा व्यवस्था मिलाउनुपर्ने र त्यसपछि घटनाको निष्पक्ष अनुसन्धान गरी दोषी देखिएकामाथि कानुनी कारबाही गर्नुपर्ने उनको माग छ।

नाबालकलाई लक्षित गरी अपमानजनक अभिव्यक्ति दिने र धम्की दिने कार्य कुनै पनि अवस्थामा स्वीकार्य हुन नसक्ने झाँक्रीको भनाइ छ। वयस्कबीचको विवादमा बालबालिकालाई मुछ्न नहुने उल्लेख गर्दै उनले सम्भावित जोखिमलाई गम्भीरतापूर्वक लिएर सम्बन्धित महिला र बालकको सुरक्षामा संवेदनशील हुन आग्रह गरेकी छन्।

झाँक्रीले रास्वपा सभापति रवि लामिछानेको पनि ध्यानाकर्षण गराउँदै पार्टीले घटनालाई गम्भीर रूपमा लिनुपर्ने बताएकी छन्। अब सम्बन्धित पक्षको सुरक्षा, घटनाको निष्पक्ष छानबिन र कानुनी जवाफदेहिताबारे प्रहरी तथा पार्टी नेतृत्वको भूमिका महत्त्वपूर्ण हुने देखिएको छ।