काठमाडौं।  नेपाली कांग्रेसको सहमहामन्त्री (पिछडिएको क्षेत्रतर्फ) मा जीवनबहादुर शाही निर्वाचित भएका छन्। चार प्रतिस्पर्धीलाई पछि पार्दै शाहीले सहमहामन्त्री पदमा जित निकालेका हुन्।

निर्वाचन पोर्टलमा उल्लेख भएअनुसार, कर्णाली प्रदेशसभामा कांग्रेस संसदीय दलका नेतासमेत रहेका शाहीले ३ हजार ९०६ मत प्राप्त गरेका छन्। उनका निकटतम प्रतिस्पर्धी जनकराज गिरीले १ हजार ३७० मत मात्रै पाएका छन्।

यस पदका अन्य प्रतिस्पर्धीमा नारायणप्रसाद भट्टराई, राजन कुँवर र रामबहादुर विष्ट थिए। शाहीले उनीहरूलाई पनि पछि पारेका हुन्।

मतगणना सम्पन्न भए पनि निर्वाचन समितिले परिणामको औपचारिक घोषणा गरिसकेको छैन। निर्वाचन समितिका सदस्य सचिव राजु कटवालका अनुसार मतगणना सकिएको छ र प्राप्त मतको यकिन गर्ने काम भइरहेको छ।

शाहीले यसअघि २०७८ सालमा सम्पन्न कांग्रेसको १४औँ महाधिवेशनमा पनि यही पदमा उम्मेदवारी दिएका थिए। त्यतिबेला उनी बद्रीप्रसाद पाण्डेसँग पराजित भएका थिए। दोस्रो प्रयासमा भने शाही सहमहामन्त्री बन्न सफल भएका हुन्।