काठमाडौं । राष्ट्रिय स्वतन्त्र पार्टी (रास्वपा) का सांसद खगेन्द्र सुनारले विवादित अडियो कृत्रिम बुद्धिमत्ता (एआई) बाट तयार पारिएको दाबी गरेपछि जनआस्थाका सम्पादक किशोर श्रेष्ठले व्यंग्यात्मक प्रश्न उठाएका छन् ।

पाँच–पाँचवटा अडियोमा ठाउँ, ठेगाना र समयसमेत मिलाएर ठेट नेपाली गाली उत्पादन गर्न सक्ने एआईले गालीलाई समेत फिल्टर नगर्ने हो भन्दै श्रेष्ठले सुनारको दाबीमाथि कटाक्ष गरेका हुन् ।

श्रेष्ठले अडियोबारे प्रतिक्रिया लिन खोज्दा सांसद सुनारले पाँच मिनेटपछि कुरा गर्ने बताए पनि त्यसपछि उनी र उनका स्वकीय सचिव (पीए) को फोन स्विच अफ भएको प्रसंगसमेत उठाएका छन् । त्यसपछि मात्रै अडियो एआईबाट बनेको दाबी सार्वजनिक भएको भन्दै उनले घटनाक्रममाथि प्रश्न गरेका छन् ।

उनले मुख्यमन्त्रीका पीएसओमार्फत गरिएको भनिएको क्रस भेरिफिकेसनदेखि ६ वटा बैंकका ४८० पृष्ठका स्टेटमेन्टसम्मका प्रसंगलाई समेत व्यंग्यात्मक रूपमा जोड्दै बिपिन आचार्य, ज्वाला सङ्ग्रौला, राजीव खत्री, प्रकाशचन्द्र परियार र हिमेश पन्तलगायतका नाम उल्लेख गरेका छन् ।