काठमाडौ । नेपाल आयल निगमले दसैँलाई लक्षित गर्दै काठमाडौँ उपत्यकाका छ स्थानबाट एलपी ग्यास वितरण सुरु गरे पनि आपूर्ति सहज हुन सकेको छैन। ग्यास लिन उपभोक्ताहरू घण्टौँ लाइनमा बस्न बाध्य भएका छन्।

आयल निगमको समन्वयमा नेपाल एलपी ग्यास उद्योग सङ्घले असोज २५ देखि ३१ गतेसम्म ग्यास सिलिन्डर साटफेर तथा बिक्रीको व्यवस्था मिलाएको छ। तर, तोकिएका बिक्री केन्द्रमा लामो लाइन लाग्ने र एकै दिनमा ग्यास नपाउने समस्या कायमै रहेको उपभोक्ताहरूको गुनासो छ।

बिहान साढे ९ बजेदेखि अपराह्न साढे ४ बजेसम्म ग्यास वितरण गर्ने व्यवस्था गरिए पनि उपभोक्ताले सहज रूपमा सिलिन्डर पाउन सकेका छैनन्। सोही दिन ग्यास उपलब्ध गराउन नसकिएकालाई टोकन दिएर फर्काउने गरिएको छ। तर, टोकन पाएपछि पनि ग्यास कहिले पाइने भन्ने निश्चित नहुँदा उपभोक्ता अन्योलमा छन्।

नेपाल आयल निगमले काठमाडौँ उपत्यकाका छ स्थानबाट विभिन्न ब्रान्डका ग्यास सिलिन्डर साटफेर तथा बिक्री गर्ने व्यवस्था गरेको छ।

काठमाडौँको सिफलचौरस्थित ग्यास एन्ड अक्सिजन ट्रेडर्सबाट एभरेस्ट र सुगम ग्यास उपलब्ध गराइएको छ। पेप्सीकोलाबाट सगर ग्यास तथा बालाजु औद्योगिक क्षेत्रको गेटअगाडिबाट नेपाल, एचपी, गीता, राजधानी र त्रिवेणी ग्यास बिक्री भइरहेको छ।

त्यस्तै, सुकेधाराबाट बाबा र श्री ग्यास, कलङ्कीबाट साइबाबा र श्रीकृष्ण ग्यास तथा ललितपुरको हरिसिद्धिबाट श्रीराम ग्यास वितरण भइरहेको छ।

दसैँको मुखमा ग्यास वितरणको व्यवस्था मिलाइए पनि लामो लाइन, पटक-पटक धाउनुपर्ने बाध्यता र वितरणमा देखिएको असहजताले उपभोक्तालाई सास्ती भएको छ।