काठमाडौं । नेपाली चलचित्र क्षेत्रको सफल शृङ्खला ‘कबड्डी’को पाँचौँ भाग ‘कबड्डी ५ः आगामी कात्तिक ६ गतेदेखि प्रदर्शनमा आउने भएको छ। रामबाबु गुरुङको लेखन तथा निर्देशनमा बनेको चलचित्रमा यसपटक मुख्य पात्र काजीको जीवनमा प्रेमसँगै परिवार, समाज र साथीभाइप्रतिको जिम्मेवारीले पार्ने प्रभावलाई देखाइनेछ।

यसअघिका शृङ्खलामा प्रेम प्राप्तिका लागि सङ्घर्ष गर्दै आएका काजीको कथा पाँचौँ भागमा नयाँ मोडमा पुगेको छ। अभिनेता दयाहाङ राईका अनुसार प्रेम प्राप्त गरेपछि सुरु हुने व्यावहारिक जीवन र त्यसमा गर्नुपर्ने सम्झौता यसपटकको कथाको मुख्य पक्ष हो।

निर्देशक गुरुङले चौथो भागलाई ‘फाइनल म्याच’का रूपमा प्रस्तुत गरिए पनि पात्रहरूको कथा पूर्ण रूपमा टुङ्गिन नसकेकाले पाँचौँ शृङ्खला निर्माण गरिएको बताएका छन्। उनका अनुसार नयाँ भाग अघिल्लो शृङ्खलाकै कथाको निरन्तरता हो।

चलचित्रको फर्स्टलुक पोस्टरमा काजीको भूमिकामा दयाहाङ राई, बीकेको भूमिकामा विजय बराल र छन्त्यालको भूमिकामा बुद्धि तामाङ देखिएका छन्। पोस्टरमा काजी क्रिकेट ब्याट समातेर सोचमग्न अवस्थामा देखिन्छन् भने बीके र छन्त्यालले उनलाई नियालिरहेका छन्।

चलचित्रको टिजर सार्वजनिक भएपछि दर्शकमाझ यसको चर्चा थप बढेको छ। टिजरमा दयाहाङ, विजय र बुद्धिसँगै विपिन कार्की, रिश्मा गुरुङ र सिर्जना गुरुङ पनि देखिएका छन्। टिजरमा अभिनेत्री मिरुना मगर नदेखिएपछि दर्शकले सामाजिक सञ्जालमा उनको भूमिकाबारे जिज्ञासा व्यक्त गरेका थिए। टिजर सार्वजनिक भएको १९ घण्टामै १० लाखभन्दा बढी पटक हेरिएको थियो।

बाँसुरी फिल्म्सको प्रस्तुतिमा बनेको चलचित्रमा दयाहाङ, विजय, बुद्धि, विपिन, रिश्मा र सिर्जनासहित पुष्कर गुरुङ, कविता आले, अरुणा कार्की, शिशिर बाङ्देल, माओत्से गुरुङ, कमलमणि नेपाललगायत कलाकारको अभिनय रहेको छ।

चलचित्रमा रामबाबु गुरुङ, मणिराम पोखरेल, मधु मिजार र विशाल गुरुङ (एलजी)को लगानी छ। सागर राज कार्यकारी निर्माता रहेको चलचित्रमा कालीप्रसाद बास्कोटा, अधा सुर र झुमा लिम्बूको सङ्गीत, सञ्जय लामाको छायाङ्कन तथा सुरेन्द्र पौडेलको सम्पादन रहेको छ।

‘कबड्डी’का अघिल्ला चारवटै शृङ्खला व्यावसायिक रूपमा सफल भएका थिए। विशेषगरी चौथो भागले बक्स अफिसमा करिब २२ करोड रुपैयाँको ग्रस कलेक्सन गरेको थियो। पाँचौँ भागले पनि पुराना पात्रको निरन्तरता र नयाँ कथावस्तुका माध्यमबाट दर्शकको अपेक्षा पूरा गर्ने चुनौती सामना गर्नुपर्नेछ।