काठमाडौं । मलेसियाका लागि प्रस्तावित नेपाली राजदूत चुडामणि खरेलले नेपाली श्रमिकलाई राहदानीलगायत कन्सुलर सेवा छिटो, सहज र प्रभावकारी बनाउने प्रतिबद्धता जनाएका छन्।

संसदीय सुनुवाइका क्रममा आफ्नो कार्ययोजना प्रस्तुत गर्दै खरेलले राहदानी सेवामा देखिएका झन्झट हटाउन नेपालस्थित राहदानी विभागसँग समन्वय गर्ने बताएका हुन्।

उनले राहदानी तयार भएपछि सुरक्षित कुरियरमार्फत नेपाली श्रमिकको आवास वा कार्यस्थलमै पुर्‍याउने व्यवस्था मिलाउने योजना अघि सारेका छन्। राहदानीको अवस्थाबारे मोबाइल सन्देशमार्फत जानकारी लिन र आफैँले ट्र्याक गर्न सक्ने डिजिटल प्रणाली सुरु गर्ने उनको योजना छ। गम्भीर बिरामी, ज्येष्ठ नागरिक तथा आकस्मिक अवस्थाका नागरिकलाई सेवामा विशेष प्राथमिकता दिइने उनले बताएका छन्।

धेरै नेपाली श्रमिक रहेका क्षेत्रमा मोबाइल राहदानी तथा कन्सुलर शिविर सञ्चालन गर्ने योजना पनि खरेलले सुनाएका छन्। यसबाट दूतावाससम्म पुग्न नसक्ने नेपाली श्रमिकलाई आफ्नै कार्यक्षेत्र नजिकबाट सेवा उपलब्ध गराउन सकिने उनको अपेक्षा छ।

खरेलका अनुसार मलेसियालाई मुख्य केन्द्र बनाएर इन्डोनेसिया, ब्रुनाई दारुसलाम, फिलिपिन्स र टिमोर लेस्तेमा समेत गैरआवासीय राजदूतका रूपमा काम गर्ने योजना छ। क्वालालम्पुरस्थित नेपाली दूतावासलाई कूटनीतिक सम्बन्ध विस्तार, आर्थिक सहकार्य र नेपाली नागरिकको पहुँच अभिवृद्धिको प्रमुख केन्द्रका रूपमा विकास गर्ने उनको प्रतिबद्धता छ।

कन्सुलर तथा कागजात प्रमाणीकरण सेवालाई पनि प्रविधिमैत्री बनाउने खरेलको योजना छ। अनलाइनबाटै प्रमाणीकरणका लागि समय लिन र आवेदनको अवस्था हेर्न सकिने प्रणाली विकास गर्ने उनले बताएका छन्। क्वालालम्पुरसम्म आउन नसक्ने टाढाका नेपालीका लागि सेवा पहुँच विस्तार गर्ने तथा प्रमाणीकरण गरिएका कागजात सुरक्षित रूपमा हुलाकमार्फत फिर्ता पठाउने विकल्प उपलब्ध गराउने उनको योजना छ।

त्यसैगरी, सेवा शुल्क, आवश्यक कागजात र सम्पर्क विवरण अनलाइनमा स्पष्ट तथा पारदर्शी रूपमा राखिने उनले बताएका छन्। यसबाट सेवाग्राहीले आवश्यक प्रक्रिया र खर्चबारे अग्रिम जानकारी पाउने अपेक्षा गरिएको छ।

मलेसियाका कारागार तथा हिरासतमा रहेका नेपाली नागरिकलाई कानुनी सहायता उपलब्ध गराउने संयन्त्र सुदृढ बनाउने प्रतिबद्धता पनि खरेलले जनाएका छन्। थुनामा रहेका नेपालीको कानुनी अवस्था, अदालतमा उपस्थित हुनुपर्ने मिति र स्वदेश फिर्तीसम्बन्धी विवरण व्यवस्थित रूपमा राख्ने उनको योजना छ।

नेपाली नागरिकको सुरक्षा सुनिश्चित गर्दै दूतावासबाट आधुनिक र प्रभावकारी सेवा प्रदान गर्ने, नेपालको आर्थिक हित प्रवर्द्धन गर्ने तथा सीप विकास, पर्यटन, व्यापार र लगानी विस्तारमा जोड दिने खरेलको कार्ययोजनामा उल्लेख छ।

उनले मलेसियाको कानुनी व्यवस्था र नेपाल-मलेसिया द्विपक्षीय संयन्त्रको दायराभित्र रहेर आपसी सम्मानका साथ काम गर्ने प्रतिबद्धता पनि जनाएका छन्। साथै, कगजी प्रक्रिया पूरा गर्नुलाई मात्र उपलब्धि नमान्ने उल्लेख गर्दै उनले नागरिकले प्राप्त गरेको सेवा र उनीहरूका समस्या समाधानलाई कार्यसम्पादनको मुख्य आधार बनाउने बताएका छन्।