काठमाडाैं । मलेसियाका लागि प्रस्तावित नेपाली राजदूत चुडामणि खरेलमाथि आर्थिक लेनदेनदेखि स्वार्थको द्वन्द्वसम्मका आरोप लागेपछि उनको संसदीय सुनुवाइ प्रभावित भएको छ।

संसदीय सुनुवाइ समितिमा उनीविरुद्ध विभिन्न उजुरी परेपछि थप अध्ययन गर्नुपर्ने भन्दै बुधबारको बैठकमा सुनुवाइ प्रक्रिया बीचमै रोकिएको हो।

समितिको बैठकमा खरेलले आफ्नो कार्ययोजना प्रस्तुत गरेपछि उनीमाथि लागेका आरोपको विषय उठेको थियो। रास्वपाका सांसद राजीव खत्रीले खरेलविरुद्ध गम्भीर प्रकृतिका उजुरी परेको भन्दै छानबिनको आवश्यकता औँल्याएपछि सुनुवाइ थप विवादमा परेको हाे।

खरेलमाथि विदेश पठाइदिने भन्दै विभिन्न व्यक्तिसँग रकम लिएको, विभिन्न स्थानमा जग्गा खरिदबिक्री गर्दा अनियमितता गरेको तथा राजदूत नियुक्त भएपछि काम मिलाइदिने आश्वासन दिएर म्यानपावर कम्पनीहरूसँग आर्थिक लेनदेन गरेको आरोप लगाइएको छ। यी आरोपसम्बन्धी विवरण संसदीय सुनुवाइ समितिसम्म पुगेका छन्।

त्यस्तै, झापाका केही स्थानीयसँग अनुदान मिलाइदिने भन्दै लाखौँ रुपैयाँ लिएको र राजदूतमा नियुक्तिका लागि सिफारिस भएपछि रकम फिर्ता गर्न थालेको आरोप पनि उनीमाथि लागेको छ।

कथित ठगीबाट प्रभावित केही व्यक्ति विदेशमा रहेको र उनीहरूले प्रमाणसहित सांसद, पत्रकार तथा अन्य व्यक्तिलाई यसबारे जानकारी गराएको दाबी गरिएको छ।

सांसद खत्रीले समितिमा यही विषय उठाएपछि अन्य सांसद वर्षमान पुन, कबीन्द्र बुर्लाकोटी र समीम मिया मिकरानीले पनि आरोपबारे थप छानबिन गर्नुपर्ने धारणा राखेका थिए।

खरेलमाथि लागेका आरोपको थप अध्ययन आवश्यक रहेको निष्कर्षसहित समितिका सभापति बोधनारायण श्रेष्ठले उनको सुनुवाइ प्रक्रिया रोकेका थिए। अब आरोपको अध्ययन र आवश्यक छानबिनपछि मात्रै सुनुवाइ प्रक्रिया कसरी अघि बढाउने भन्ने विषय टुंगिनेछ।